ന്യൂഡല്‍ഹി: കരിയറിന്‍റെ തുടക്കകാലത്ത് ചാറ്റ്ഷോക്കിടെ നടത്തിയ ഒരു അഭിപ്രായ പ്രകടനം കൊണ്ട് ബോളിവുഡ് നടി ആലിയ ബട്ട് ട്രോള്‍ കഥാപാത്രമായി മാറിയിരുന്നു. ആനുകാലിക വിഷയങ്ങളിലെ താരത്തിന്‍റെ അറിവ് അളന്ന സന്ദര്‍ഭമായിരുന്നു അത്. ഏതായാലും വര്‍ഷങ്ങള്‍ക്കിപ്പുറവും ആലിയക്ക് മാറ്റമൊന്നും സംഭവിച്ചിട്ടില്ലെന്ന് തുറന്ന് കാട്ടുകയാണ് സൈബര്‍ലോകം അവരുടെ ഏറ്റവും പതിയ ട്വീറ്റിലൂടെ.
പ്രിയങ്ക ചോപ്ര, കരീന കപൂര്‍ തുടങ്ങി നിരവധി അഭിനേതാക്കളും കായിക താരങ്ങളും ഇന്ത്യന്‍ സംഘത്തിന് ആശംസകള്‍ നേര്‍ന്നിട്ടുണ്ടെങ്കിലും ആലിയയുടെ പോസ്റ്റാണ് ശ്രദ്ധിക്കപ്പെട്ടത്.
ടോക്യോ ഒളിമ്ബിക്സിനായി പുറപ്പെട്ട ഇന്ത്യന്‍ സംഘത്തിന് ആശംസകള്‍ അര്‍പ്പിച്ച്‌ ആലിയ ട്വിറ്ററില്‍ പങ്കുവെച്ച ചിത്രം മാറിപ്പോയതാണ് പുതിയ സംഭവം. ഒളിമ്ബിക്സിന്‍റെ കഴിഞ്ഞ പതിപ്പില്‍ ഗുസ്തി താരം സുശീല്‍ കുമാര്‍ ഇന്ത്യന്‍ പതാകയേന്തുന്ന ചിത്രം െവച്ചായിരുന്നു ആലിയയുടെ ആശംസ.
‘ടോക്യോ 2021’ എന്ന ഹാഷ്ടാഗോട് കൂടിയായിരുന്നു ആലിയയുടെ പോസ്റ്റ്. ഉടന്‍ തന്നെ അബദ്ധം ചൂണ്ടിക്കാട്ടിയ നെറ്റിസണ്‍സ് പതാകവാഹകനായ സുശീല്‍കുമാര്‍ ഇപ്പോള്‍ കൊലപാതകക്കേസില്‍ ജയിലിലാണെന്ന കാര്യവും നടിയെ ഓര്‍മിപ്പിച്ചു. നിരവധി ട്രോളുകളാണ് ആലിയക്കെതിരെ സോഷ്യല്‍ മീഡിയയില്‍ പ്രത്യക്ഷപ്പെട്ടത്.
പോസ്റ്റ് ഇടുന്നതിന് മുമ്ബ് ഒരു വട്ടമെങ്കിലും ഗൂഗിളില്‍ സെര്‍ച് ചെയ്യണമെന്നും ‘സ്റ്റുഡന്‍റ് ഓഫ് ദ ഇയര്‍’ താരം ഇപ്പോഴും 2012ലാണ് ജീവിക്കുന്നതെന്നുമാണ് ആരാധകര്‍ കമന്‍റ് ചെയ്യുന്നത്. ആലിയ പകരം ക്രിക്കറ്റ് ടീമിന്‍റെ ചിത്രം പങ്കുവെച്ചില്ലെല്ലോ എന്ന് ഒരാള്‍ കളിയാക്കുന്നുണ്ട്.
അതേ സമയം ടോക്യോയയില്‍ ഇന്ത്യക്ക് ഇതുവരെ ഒരു വെള്ളിമെഡല്‍ മാത്രമാണ് നേടാനായത്. വനിതകളുടെ 49 കിലോഗ്രാം ഭാരോദ്വഹനത്തില്‍ മീരബായി ചാനുവാണ് മെഡല്‍ സ്വന്തമാക്കിയത്.