കൊച്ചി: ആക്രി പെറുക്കലിന്റെ മറവില് അടച്ചിട്ട വീടുകളില്നിന്ന് പണവും വസ്തുക്കളും മോഷ്ടിക്കുന്ന നാടോടി സംഘം പിടിയില്.
എറണാകുളം ലക്ഷ്മി ആശുപത്രിക്ക് സമീപമുള്ള വീട്ടില് നിന്നും 20 പവന് സ്വര്ണവും 3,25,000 രൂപയും അമേരിക്കന് ഡോളറും ഗോള്ഡന് റോളക്സ് വാച്ചുമടക്കം 25 ലക്ഷം രൂപ വരുന്ന വസ്തുക്കളാണ് പ്രതികള് മോഷ്ടിച്ചത്.
കോഴിക്കോട്, തിരുവോട് കോട്ടൂര് ലക്ഷം വീട്ടില് വിഷ്ണുവിന്റെ ഭാര്യ അമരാവതി (20), വയനാട് ബത്തേരി കേണിച്ചിറ പൂതാടി കരയില് എകെജി റോഡില് മണിക്കുന്ന് വീട്ടില്, മാരിമുത്തുവിന്റെ ഭാര്യ ദേവി (22), മുത്തപ്പന്റെ കസ്തൂരി (22), കേശവന്റെ ഭാര്യ ദേവി (21) എന്നിവരാണ് പിടിയിലായത്.
രാവിലെ മുതല് വൈകിട്ട് വരെ കുട്ടികളുമായി ആക്രി പെറുക്കാന് എന്ന വ്യാജേന കറങ്ങി നടന്ന് ആളില്ലാത്ത വീടുകള് നോക്കി വെച്ച് മോഷണം നടത്തുകയാണ് ഇവര് ചെയ്യുന്നതെന്ന് പോലീസ് പറഞ്ഞു. ചില വീടുകളില് രാത്രി സമയങ്ങളില് ഇവരോടൊപ്പമുള്ള പുരുഷന്മാരാണ് മോഷണത്തിന് കയറുന്നത്.
സിസിടിവി ക്യാമറ ഉള്പ്പെടെ സുരക്ഷാ സജ്ജീകരണങ്ങള് ഉള്ള വീടുകളെ ഒഴിവാക്കിയാണ് സംഘം മോഷണം നടത്തുന്നത്. പൂട്ടിക്കിടക്കുന്ന വീടാണെന്ന് മനസ്സിലാക്കാന് അടയാളം നല്കും. തുടര്ന്ന് രാത്രി മോഷണം നടത്തുകയാണ് പതിവ്. സെന്ട്രല് പൊലീസ് സ്റ്റേഷന് ഇന്സ്പെക്ടര് വിജയശങ്കറിന്റെ നേതൃത്തിലുള്ള അന്വേഷണ സംഘമാണ് പ്രതികളെ പിടികൂടിയത്