ഭരണങ്ങാനം: വിശുദ്ധ അൽഫോൻസാ തീർഥാടന കേന്ദ്രത്തിൽ വിശുദ്ധ അൽഫോൻസാമ്മയുടെ തിരുനാളിനു ഇന്ന് കൊടിയേറും. ഈ വർഷത്തെ തിരുനാളിന് അൽഫോൻസാമ്മയുടെ സ്വർഗപ്രാപ്തിയുടെ 75-ാം വാർഷികദിനമെന്ന പ്രത്യേകത കൂടിയുണ്ട്. ഇന്ന് രാവിലെ 10.45നു പാലാരൂപത ബിഷപ് മാർ ജോസഫ് കല്ലറങ്ങാട്ട് തിരുനാളിനു കൊടിയേറ്റും. തുടർന്നു പാലാ രൂപത സഹായ മെത്രാൻ മാർ ജേക്കബ് മുരിക്കൻ വിശുദ്ധ കുർബാന അർപ്പിച്ച് സന്ദേശം നൽകും. ദിവസവും രാവിലെ 5.30, 6.45, 8.00, 11.00, ഉച്ചകഴിഞ്ഞു മൂന്ന്, അഞ്ച് എന്നീ സമയങ്ങളിൽ വിശുദ്ധ കുർബാന ഉണ്ടായിരിക്കും.
വൈകുന്നേരം അഞ്ചിനുള്ള വിശുദ്ധ കുർബാനയ്ക്കുശേഷം ജപമാല പ്രാർഥന നടത്തും. 27നു വൈകുന്നേരം അഞ്ചിനു മാർ ജോസഫ് കല്ലറങ്ങാട്ട് വിശുദ്ധ കുർബാന അർപ്പിച്ച് സന്ദേശം നൽകും. പ്രധാന തിരുനാൾ ദിനമായ 28നു രാവിലെ 11ന് സീറോ മലബാർ സഭ മേജർ ആർച്ച്ബിഷപ് കർദിനാൾ മാർ ജോർജ് ആലഞ്ചേരിയുടെ മുഖ്യകാർമികത്വത്തിൽ തിരുനാൾ റാസ അർപ്പിക്കും.കോവിഡ് നിയന്ത്രണങ്ങൾക്കു വിധേയമായി വിശ്വാസികൾക്കു തിരുനാളിൽ പങ്കെടുക്കാം. ഓണ്ലൈൻ വഴി എല്ലാ തിരുക്കർമങ്ങളും ലൈവായി സംപ്രേഷണം ചെയ്യും. തിരുനാളിന്റെ തുടക്കദിവസമായ നാളെ മുതൽ 28 വരെ ശാലോം ടിവിയിൽ രാവിലെ 6.30നും ഷെക്കൈന ടിവിയിൽ എല്ലാദിവസവും രാവിലെ എട്ടിനും വിശുദ്ധ അൽഫോൻസ തീർഥാടന ദേവായത്തിലർപ്പിക്കുന്ന വിശുദ്ധ കുർബാന സംപ്രേഷണം ചെയ്യും