ലക്നോ: ഉത്തര്പ്രദേശില് കര്ഷക പ്രതിഷേധത്തിനിടയിലേക്ക് കേന്ദ്രമന്ത്രിയുടെ മകന് ഓടിച്ച വാഹനം ഇടിച്ചുകയറ്റി, രണ്ട് കര്ഷകര് കൊല്ലപ്പെട്ടു. എട്ട് പേര്ക്ക് ഗുരുതര പരിക്കേറ്റു. ഇവരെ ആശുപത്രിയില് പ്രവേശിപ്പിച്ചു.
ലാഖിംപുര് ഖേരിയിലായിരുന്നു സംഭവം. ഉപമുഖ്യമന്ത്രി കേശവ് മൗര്യ, കേന്ദ്രമന്ത്രി അജയ് മിശ്ര എന്നിവരുടെ സന്ദര്ശനത്തോടനുബന്ധിച്ച് കര്ഷകര് നടത്തിയ പ്രതിഷേധമാണ് സംഘര്ഷത്തില് കലാശിച്ചത്.
കേന്ദ്രമന്ത്രിയുടെ അകമ്ബടി വാഹനങ്ങളിലൊന്നാണ് കര്ഷകര്ക്കുമുകളിലേക്ക് പാഞ്ഞുകയറിയത്. വഴിയരികില് നില്ക്കുകയായിരുന്ന പ്രതിഷേധക്കാര്ക്ക് നേരെയാണ് വാഹനം ഇടിച്ചുകയറിയതെന്ന് സംയുക്ത കിസാന് മോര്ച്ച ട്വീറ്റ് ചെയ്തു.
അജയ് മിശ്രയുടെ മകന് ആശിഷ് മിശ്ര ഓടിച്ച വാഹനം പ്രതിഷേധക്കാര്ക്കിടയിലേക്ക് ഇടിച്ചുകയറ്റുകയായിരുന്നെന്ന് ദൃക്സാക്ഷികള് പറയുന്നു. രണ്ട് പേര് സംഭവസ്ഥലത്തു തന്നെ മരിച്ചു. സംഭവത്തില് പ്രതിഷേധിച്ച് കര്ഷകര് വാഹനങ്ങള്ക്ക് തീയിട്ടു. കൂടുതല് കര്ഷകര് ലാഖിംപുര് ഖേരിയിലേക്ക് തിരിച്ചിട്ടുണ്ട്.