തിരുവനന്തപുരം: കരാറുകാരെയും കൂട്ടി എം.എല്‍.എമാര്‍ കാണാന്‍ വരേണ്ടെന്ന മന്ത്രി റിയാസിെന്‍റ നിലപാടിനെ പിന്തുണച്ച്‌ സി.പി.എം. മന്ത്രി വ്യക്തമാക്കിയത് പാര്‍ട്ടിയുടെ പൊതുനിലപാടാണെന്ന് സി.പി.എം ആക്ടിങ് സെക്രട്ടറി എ. വിജയരാഘവന്‍ പറഞ്ഞു. പൊതുവേ ഇത്തരം കാര്യങ്ങളില്‍ പൊതുനിര്‍ദേശങ്ങള്‍ സി.പി.എം നല്‍കാറുണ്ട്. അതിനനുസൃതമായ കാര്യമാണ് മന്ത്രി വ്യക്തമാക്കിയത്. സര്‍ക്കാര്‍ എങ്ങനെ പ്രവര്‍ത്തിക്കണമെന്നതും മന്ത്രിമാരുടെ ഓഫിസ് എങ്ങനെ പ്രവര്‍ത്തിക്കണമെന്നതും സംബന്ധിച്ച്‌ സി.പി.എമ്മിന് വ്യക്തമായ സമീപനമുണ്ട്. സര്‍ക്കാറും മന്ത്രിമാരും പൊതുവെ നല്ല നിലയിലാണ് പ്രവര്‍ത്തിക്കുന്നത്. ഊര്‍ജസ്വലമായി സര്‍ക്കാര്‍ പ്രവര്‍ത്തിക്കുമ്ബോള്‍ ആ പ്രവര്‍ത്തനത്തിന് മങ്ങലേല്‍പ്പിക്കാനുള്ള ശ്രമമുണ്ടാവുക സ്വാഭാവികമാണെന്നും സംസ്ഥാന സെക്രട്ടേറിയറ്റ് യോഗ തീരുമാനങ്ങള്‍ വിശദീകരിക്കാന്‍ നടത്തിയ വാര്‍ത്തസമ്മേളനത്തില്‍ വിജയരാഘവന്‍ വ്യക്തമാക്കി.
നിയമസഭകക്ഷിയോഗത്തില്‍ എം.എല്‍.എയുടെ വിമര്‍ശനത്തെപ്പറ്റി ആവര്‍ത്തിച്ച്‌ ചോദിച്ചപ്പോള്‍, താന്‍ പാര്‍ലമെന്‍ററിപാര്‍ട്ടി യോഗത്തില്‍ പങ്കെടുത്തിട്ടില്ലെന്നായിരുന്നു വിജയരാഘവെന്‍റ മറുപടി. നിങ്ങളില്‍ പലരും വാര്‍ത്ത കൊടുത്തത് ആ യോഗത്തില്‍ പങ്കെടുത്തവരെപോലെയാണ്. സാമാജികര്‍ ഉന്നയിക്കുന്ന വിഷയങ്ങളില്‍ അനുഭാവസമീപനമാണ് മന്ത്രിമാര്‍ക്കുള്ളത്. ജനങ്ങളുടെ കാര്യങ്ങള്‍ ശിപാര്‍ശകളില്ലാതെ വേഗത്തില്‍ നടക്കണമെന്നതാണ് നിലപാട്. അതിനനുസരിച്ച്‌ മന്ത്രിമാരുടെ ഓഫിസുകള്‍ മെച്ചപ്പെടണം. അതിനുള്ള നിര്‍ദേശം നല്‍കിയിട്ടുണ്ടെന്നും അദ്ദേഹം കൂട്ടിേച്ചര്‍ത്തു.