തിരുവനന്തപുരം: മോട്ടോര് വാഹനവകുപ്പിലെ ആധാര് അധിഷ്ഠിത സേവനങ്ങള് അട്ടിമറിച്ച സംഭവത്തില് ഗതാഗത കമീഷണറേറ്റ് വിശദാന്വേഷണത്തിന്.
വിശദപരിശോധനക്ക് ഗതാഗത കമീഷണറേറ്റിലെ സ്മാര്ട്ട് സപ്പോര്ട്ട് സെല്ലിനെ ചുമതലപ്പെടുത്തി.
സമാന്തരമായി ജില്ലകളില്നിന്ന് ഞായറാഴ്ച തന്നെ ഗതാഗത കമീഷണറേറ്റ് വിവരങ്ങള് ആരാഞ്ഞിരുന്നു. കേന്ദ്ര സര്ക്കാറിന്റെ ആധാര് പോര്ട്ടലുമായി ബന്ധിപ്പിച്ചാണ് സേവനങ്ങള്ക്കായി മോട്ടോര് വാഹന വകുപ്പ് ആധാര് വിവരങ്ങള് പ്രയോജനപ്പെടുത്തിയിരുന്നത്.
നവീകരണത്തിന്റെ ഭാഗമായി ആധാര് പോര്ട്ടലിലെ ഇ-കെ.വൈ.സി സംവിധാനം പ്രവര്ത്തിക്കാത്തതാണ് മോട്ടോര് വാഹനവകുപ്പ് സേവനങ്ങളെയും ബാധിച്ചതെന്നാണ് അധികൃതരുടെ വിശദീകരണം. എന്നാല്, ആധാര് നമ്ബര് ടൈപ് ചെയ്യാനുള്ള കോളം തന്നെ വെബ് സൈറ്റില്നിന്ന് അപ്രത്യക്ഷമായതാണ് സംശയം വര്ധിപ്പിക്കുന്നത്. തുടക്കത്തില് ആധാര് നമ്ബര് ടൈപ് ചെയ്ത് തുടര് നടപടികളിലേക്ക് നീങ്ങുമ്ബോള് ‘ആധാര് സേവനം ലഭ്യമല്ല, ആര്.ടി ഓഫിസില് ബന്ധപ്പെടുക’ എന്ന സന്ദേശമാണ് ലഭിച്ചിരുന്നത്. മൂന്നു ദിവസമായി ആധാര് ടൈപ് ചെയ്യാനുള്ള കോളം തന്നെ ഒഴിവാക്കിയിട്ടുണ്ട്.
ആധാര് അധിഷ്ഠിത സേവനങ്ങള് പിന്വലിക്കാന് തീരുമാനമെടുത്തിട്ടില്ലെന്നും അഡീഷനല് ട്രാന്സ്പോര്ട്ട് കമീഷണര് പി.എസ്. പ്രമോജ് ശങ്കര് ‘മാധ്യമ’ത്തോട് പറഞ്ഞു. ”കൂടുതല് സേവനങ്ങള് ആധാറുമായി ബന്ധിപ്പിക്കാന് ശ്രമം നടക്കുകയാണ്. ഇതില് നിന്ന് പിന്നോട്ട് പോകുന്ന പ്രശ്നവുമില്ല. ഇക്കാര്യത്തില് ചെറിയ വിട്ടുവീഴ്ചക്കുപോലും തയാറാകില്ലെന്നും അദ്ദേഹം പറഞ്ഞു.
അപേക്ഷ ഓണ്ലൈനില് നല്കിയാലും രേഖകള് പ്രിന്റെടുത്ത് ഓഫിസിലെത്തിക്കുന്ന രീതി അവസാനിപ്പിച്ചാണ് കഴിഞ്ഞ ഡിസംബര് 24 മുതല് വാഹനങ്ങളുടെ ഉടമസ്ഥാവകാശം മാറ്റല്, രജിസ്ട്രേഷന് സര്ട്ടിഫിക്കറ്റിലെ വിലാസം തിരുത്തലടക്കം ഏഴു സേവനങ്ങള് ആധാര് അധിഷ്ഠിതമാക്കിയത്.
ഓണ്ലൈന് അപേക്ഷയില് വാഹന ഉടമയുടെ ആധാര് മാനദണ്ഡമാക്കിയതോടെ, ഈ ആധാര് ബന്ധിപ്പിച്ച മൊബൈല് നമ്ബറിലേക്കാണ് തുടര് അറിയിപ്പുകളും സന്ദേശങ്ങളുമെത്തുക. ഇടനിലക്കാര്ക്ക് മാത്രമല്ല, കൈമടക്ക് വാങ്ങുന്ന ഉദ്യോഗസ്ഥര്ക്കും ഇത് വലിയ വെല്ലുവിളിയായി. തുടക്കത്തില് തന്നെ പുതിയ സംവിധാനം അട്ടിമറിക്കാന് ശ്രമമുണ്ടായിരുന്നു. പുതിയ സംവിധാനം ഏര്പ്പെടുത്തിയെങ്കിലും വളരെ കുറഞ്ഞ അപേക്ഷകളാണ് ആധാര് അധിഷ്ഠിതമായി ലഭിച്ചത്.