തൊഴിലിടങ്ങളില്‍ സ്ത്രീകളെ അപമാനിച്ചാല്‍ 10,000 ദിര്‍ഹം പിഴയും ഒരു വര്‍ഷം തടവും
യു.എ.ഇ.യില്‍ ജോലിസ്ഥലങ്ങളില്‍ സ്ത്രീകളോട് മോശമായി പെരുമാറുന്നവര്‍ക്ക് ഏറ്റവും കുറഞ്ഞത് 10,000 ദിര്‍ഹം പിഴയും ഒരു വര്‍ഷം വരെ തടവും ലഭിക്കുമെന്ന് നിയമവിദഗ്ധര്‍ ചൂണ്ടിക്കാട്ടുന്നു.
യു.എ.ഇ. തൊഴില്‍ നിയമത്തിലെ ആര്‍ട്ടിക്കിള്‍ 13 (13) പ്രകാരം ജീവനക്കാര്‍ക്ക് അനുയോജ്യമായ തൊഴിലന്തരീക്ഷം ഉറപ്പാക്കേണ്ടത് തൊഴിലുടമയുടെ ഉത്തരവാദിത്വമാണ്.
വാക്കുകൊണ്ടോ പ്രവൃത്തി കൊണ്ടോ അപമാനിക്കുക, അശ്ലീല പദപ്രയോഗങ്ങള്‍ നടത്തുക, ശാരീരികമായും മാനസികമായും ഉപദ്രവിക്കുക, ഭീഷണിപ്പെടുത്തുക തുടങ്ങിയവ ശിക്ഷാര്‍ഹമാണ്. നിയമലംഘകര്‍ക്ക് യു.എ.ഇ. ശിക്ഷാനിയമത്തിലെ വ്യവസ്ഥകള്‍ പ്രകാരം ക്രിമിനല്‍കുറ്റങ്ങള്‍ ചുമത്തും. തൊഴിലിടങ്ങളില്‍ ഏതെങ്കിലും വിധമുള്ള അനുചിത പെരുമാറ്റങ്ങള്‍ നേരിട്ടാല്‍ കുറ്റക്കാരനായ സഹപ്രവര്‍ത്തകനെതിരേ നടപടിയെടുക്കാൻ ആവശ്യപ്പെട്ടുകൊണ്ട് തൊഴിലുടമയ്‌ക്കോ ദുബായ് പോലീസിനോ രേഖാമൂലം പരാതി നല്‍കണം.
വനിതാ ജീവനക്കാരില്‍നിന്ന് ഇത്തരത്തിലുള്ള പരാതികള്‍ ലഭിച്ചുകഴിഞ്ഞാല്‍ കുറ്റാരോപിതനായ വ്യക്തിക്കെതിരേ മുന്നറിയിപ്പ് നോട്ടീസ് പുറപ്പെടുവിക്കാനും അയാളെ ജോലിയില്‍നിന്ന് പിരിച്ചുവിടാനും സ്ഥാപനത്തിന് അധികാരമുണ്ടെന്നും നിയമവിദഗ്ധര്‍ പറഞ്ഞു. സ്ത്രീകള്‍ക്ക് നേരെ നടക്കുന്ന അതിക്രമങ്ങള്‍ക്ക് കടുത്ത ശിക്ഷാനടപടികള്‍ നേരിടേണ്ടി വരുമെന്ന് പ്ലബ്ലിക് പ്രോസിക്യൂഷൻ ആവര്‍ത്തിച്ച്‌ മുന്നറിയിപ്പുകള്‍ നല്‍കുന്നുണ്ട്.