ചെന്നൈ: ഫേസ്ബുക്കിൽ പരിചയപ്പെട്ട ആൾക്കൊപ്പം ജീവിക്കാൻ ഇറങ്ങിത്തിരിച്ച യുവതിയുടെ മൃതദേഹം കത്തിക്കരിഞ്ഞ നിലയിൽ. തിരുവനന്തപുരം സ്വദേശിനി രഞ്ജിനിയുടെ (32) മൃതദേഹമാണ് കൃഷ്ണഗിരി കാവേരിപ്പട്ടണത്തിനു സമീപം കണ്ടെത്തിയത്. ഫേസ്ബുക്കിലൂടെ പരിചയപ്പെട്ട സൂര്യ എന്ന യുവാവിനൊപ്പം ജീവിക്കാനായി തമിഴ്നാട്ടിൽ എത്തിയതായിരുന്നു രഞ്ജിനി
ഭർത്താവിനേയും ബന്ധുക്കളേയും ഉപേക്ഷിച്ച് തമിഴ്നാട്ടിലെത്തിയ യുവതി സൂര്യയുമായി ഒന്നിച്ചു ജീവിക്കുകയായിരുന്നു. കാവേരിപ്പട്ടണത്തിനു സമീപമുള്ള വസ്ത്രശാലയിൽ നാല് മാസത്തോളം രഞ്ജിനി ജോലി ചെയ്തിരുന്നു.
ഇതിനിടെ ഒരാഴ്ചത്തെ ഡൽഹി യാത്ര രഞ്ജിനി നടത്തിയിരുന്നു. ഇതു സംബന്ധിച്ചുള്ള വിവരം പങ്കുവെയ്ക്കാതിരുന്നതിനെത്തുടർന്ന് രഞ്ജിനിയും സൂര്യയും തമ്മിൽ വാക്കുതർക്കം ഉണ്ടായി. ഇന്നലെ മുതൽ കാണാതായ രഞ്ജിനിയുടെ മൃതദേഹം കത്തിക്കരിഞ്ഞ നിലയിലാണ് കണ്ടെത്തിയത്
യുവതിയുടെ മരണത്തിനു പിന്നാലെ സൂര്യ ഒളിവിലാണെന്ന് പോലീസ് പറഞ്ഞു. മാനസിക വിഷമത്തെത്തുടർന്ന് ആത്മഹത്യ ചെയ്യുകയാണെന്നുള്ള രഞ്ജിനിയുടെ കുറിപ്പ് കണ്ടെത്തിയിട്ടുണ്ട്. സൂര്യയെ ചോദ്യംചെയ്താൽ കൂടുതൽ തെളിവ് ലഭിക്കുമെന്നാണ് പോലീസ് കരുതുന്നത്.