റാന്നി: മുഖ്യമന്ത്രിയുടെ ഓഫിസ് ഇടപെട്ടതിനാല് ചോര്ന്നൊലിക്കാത്ത കൂരക്ക് കീഴില് അഞ്ജലിക്കും അഞ്ജനക്കും ഇനി പഠനം തുടരാം. കൊടുങ്കാറ്റില് മരം കടപുഴകി വീട് തകര്ന്ന വലിയകാവ് ഓലിക്കല് കലായില് ഉഷാകുമാരിക്ക് നഷ്ടപരിഹാരം നല്കാന് പത്തനംതിട്ട കലക്ടര് ഉത്തരവായി. ശക്തമായ കാറ്റില് ഉഷാകുമാരിയുടെ വീടിന് മുന്നില്നിന്ന മരം ഒടിഞ്ഞുവീഴുകയായിരുന്നു. മുന്ഭാഗത്തെ മേല്ക്കൂര തകര്ന്ന വീടിന് മുകളില് ടാര്പോളിന് കെട്ടി ഭാഗികമായി ചോര്ച്ച ഒഴിവാക്കിയാണ് അഞ്ചുമാസമായി ഉഷാകുമാരിയും ഭര്ത്താവ് രാജപ്പനും മക്കളായ അഞ്ജലിയും അഞ്ജനയും കഴിയുന്നത്.
സംഭവം നടന്ന അടുത്തദിവസം തന്നെ ഉഷാകുമാരി റാന്നി-അങ്ങാടി വില്ലേജ് ഓഫിസില് നഷ്ടപരിഹാരത്തിനായി അപേക്ഷ നല്കിയിരുന്നു. പിന്നീട് റാന്നി താലൂക്ക് ഓഫിസ്, കലക്ടറേറ്റ് എന്നിവിടങ്ങളില് പലതവണ കയറിയിറങ്ങിയെങ്കിലും നഷ്ടപരിഹാരം ലഭിച്ചില്ല.
പിന്നീടാണ് ഗ്രാമപഞ്ചായത്ത് അംഗം പി.എസ്. സതീഷ്കുമാറിെന്റ സഹായത്തോടെ മുഖ്യമന്ത്രിയുടെ ഓഫിസില് പരാതി നല്കിയത്. അവിടന്നുള്ള നിര്ദേശത്തെ തുടര്ന്ന് പ്രശ്നത്തില് ഇടപെട്ട ജില്ല കലക്ടര് വിദ്യ എസ്.അയ്യര് ഉഷാകുമാരിക്ക് നഷ്ടപരിഹാര തുക അനുവദിച്ച് ഉത്തരവായി. കലക്ടറുടെ ഉത്തരവ് ഗ്രാമപഞ്ചായത്ത് അംഗം പി.എസ്. സതീഷ്കുമാര്, ബ്ലോക്ക് പഞ്ചായത്ത് അംഗം എം.എസ്. സുജ ബിനോയി വലിയകാവ് വാര്ഡ് വികസനസമിതി അംഗങ്ങളായ ജോണ് മാന്താനത്ത്, ഇ.ടി. കുഞ്ഞുമോന് എന്നിവര് ചേര്ന്ന് ഉഷാകുമാരിക്ക് കൈമാറി.