താനെ: ആപ്പ് പ്രവൃത്തിക്കാത്തതിനെ തുടര്ന്ന് ബാങ്കില് വിളിച്ച് പരാതിപ്പെട്ടയാളുടെ അക്കൗണ്ടില്നിന്ന് 9.53 ലക്ഷം രൂപ നഷ്ടമായി. മഹാരാഷ്ട്രയിലെ താനെയില് 53കാരനായ മുന് നാവിക സേന ഉദ്യോഗസ്ഥനാണ് തട്ടിപ്പിനിരയായത്.
ദേശസാല്കൃത ബാങ്കില് അക്കൗണ്ടുള്ള ഇദ്ദേഹം ബാങ്കിന്റെ മൊബൈല് ആപ്പ് പ്രവര്ത്തനരഹിതമായതിനാല് ജനുവരി 23ന് കസ്റ്റമര് കെയര് ഡെസ്കുമായി ബന്ധപ്പെട്ട് പരാതിപ്പെട്ടിരുന്നു. തുടര്ന്ന് ബാങ്കില്നിന്ന് എന്ന പേരില് ഒരു ഫോണ്കോള് വന്നു.
മൊബൈല് ഫോണില് ആപ്പ് ഡൗണ്ലോഡ് ചെയ്യാനും രഹസ്യവിവരങ്ങള് പങ്കുവെക്കാനും ആവശ്യപ്പെട്ടു. ഇതനുസരിച്ചപ്പോഴാണ് നിലവില് സ്വകാര്യ കമ്ബനിയില് ജോലി ചെയ്യുന്ന ബദ്ലാപൂര് സ്വദേശിയായ ഇദ്ദേഹത്തിന്റെ ബാങ്ക് അക്കൗണ്ടില് നിന്ന് അജ്ഞാതന് 9.53 ലക്ഷം രൂപ പിന്വലിച്ചതെന്ന് ബദ്ലാപൂര് (വെസ്റ്റ്) പൊലീസ് അറിയിച്ചു.
കസ്റ്റമര് സര്വിസ് സെല് എക്സിക്യൂട്ടീവ് എന്ന പേരിലാണ് ഫോണ് വന്നത്. ‘AnyDesk’ എന്ന ആപ്പ് ഡൗണ്ലോഡ് ചെയ്യാന് അയാള് ആവശ്യപ്പെടുകയായിരുന്നു. തുടര്ന്ന് ചില നിര്ദേശങ്ങള് നല്കുകയും ബാങ്ക് അക്കൗണ്ടിനെക്കുറിച്ചുള്ള ചില വിവരങ്ങള് ആരായുകയും ചെയ്തു. പിന്നീട് യൂസര് ഐഡിയും പാസ്വേഡും മാറിയെന്നും ആപ്പ് ഉപയോഗിക്കാമെന്നും ഇയാള് അക്കൗണ്ട് ഉടമയോട് പറഞ്ഞു.
എന്നാല്, ജനുവരി 24ന് തന്റെ അക്കൗണ്ടുമായി ബന്ധിപ്പിച്ച മൊബൈല് നമ്ബര് മാറിയതായി ബാങ്കില് നിന്ന് യുവാവിന് സന്ദേശം ലഭിച്ചു. അതേക്കുറിച്ച് അന്വേഷിക്കാന് ബാങ്കില് പോയപ്പോഴാണ് തന്റെ അക്കൗണ്ടില് നിന്ന് മറ്റൊരു അക്കൗണ്ടിലേക്ക് 9,53,363 രൂപ ട്രാന്സ്ഫര് ചെയ്തതായി വിവരം ലഭിച്ചതെന്ന് ഇദ്ദേഹം പറഞ്ഞു.
തുടര്ന്ന് പൊലീസില് പരാതി നല്കുകയായിരുന്നു. ഇന്ത്യന് ശിക്ഷാ നിയമം സെക്ഷന് 420 (വഞ്ചന), ഇന്ഫര്മേഷന് ടെക്നോളജി നിയമത്തിലെ വകുപ്പുകള് എന്നിവ പ്രകാരം കേസെടുത്ത് അന്വേഷണം ആരംഭിച്ചതായി പൊലീസ് അറിയിച്ചു.