മുട്ടം: തൊടുപുഴ ആറ്റിലൂടെ ഒഴുകിവന്ന മധ്യവയസ്കന്റെ മൃതദേഹം പെരുമറ്റം സ്വദേശി പാറക്കല് ഷിഹാബുദ്ദീന് (സിനാജ്) കരക്കെത്തിച്ചത് പ്ലാസ്റ്ററിട്ട കൈയുമായി.
കഞ്ഞിക്കുഴി സ്വദേശി പുലക്കുടിയില് ഡെന്നിയുടെ മൃതദേഹമാണ് പുഴയില്നിന്ന് കരക്കെത്തിച്ചത്. വ്യാഴാഴ്ച വൈകീട്ട് അഞ്ചോടെ തറവാട് വീടിന് സമീപം നില്ക്കുമ്ബോള് പുഴയിലൂടെ മൃതദേഹം ഒഴുകിപ്പോകുന്നത് കണ്ടു. ഉടന് തന്റെ ഓട്ടോറിക്ഷയുമായി ഒരു കിലോമീറ്റര് താഴ്ഭാഗത്ത് മാല പമ്ബ് ഹൗസിന് സമീപം എത്തി പുഴയിലിറങ്ങി നീന്തി മൃതദേഹം കരക്കെത്തിച്ചു.
അപകടത്തില് കൈയെല്ല് പൊട്ടി പ്ലാസ്റ്റര് ഇട്ടിരിക്കുകയാണ് ഷിഹാബുദ്ദീന്. സിനിമ നടന് അനില് നെടുമങ്ങാട് മലങ്കര ഡാമില് മുങ്ങിമരിച്ചപ്പോഴും മുങ്ങിയെടുത്തത് ഷിഹാബുദ്ദീനായിരുന്നു. പൊലീസ് മേല്നടപടി സ്വീകരിച്ച് മൃതദേഹം മോര്ച്ചറിയിലേക്ക് മാറ്റി.