വിഴിഞ്ഞം: സ്വത്തുതര്‍ക്കത്തിന്റെ പേരില്‍ വഴക്കടിച്ച മകള്‍ പിതാവിനെ കല്ലുകൊണ്ട് തലക്കടിച്ച്‌ വീഴ്ത്തി .പയറ്റുവിള പുളിയൂര്‍ക്കോണം കുന്നുവിള വീട്ടില്‍ ശ്രീധരന്‍ നാടാറി(73)നെയാണ് മകള്‍ മിനിമോള്‍(46) ആക്രമിച്ചത്. യുവതിയെ അറസ്റ്റ് ചെയ്ത വിഴിഞ്ഞം പൊലീസ് കൊലപാതക ശ്രമത്തിന് കേസെടുത്തു.ശനിയാഴ്ച വൈകീട്ട് അഞ്ചരയോടെയായിരുന്നു സംഭവം. ശ്രീധരനെയും മകന്‍ അനിലിനെയും മരുമകളെയും അവരുടെ കുട്ടികളെയും യുവതി അസഭ്യംപറയുകയും അനിലിന്റെ കാര്‍ തല്ലിപ്പൊട്ടിക്കുകയും ചെയ്തിരുന്നു.
ഇത് ചോദ്യംചെയ്തതിലുള്ള വൈരാഗ്യത്തിലാണ് മിനിമോള്‍ ശ്രീധരനെ തള്ളിയിട്ട് മര്‍ദിച്ചും കല്ലെടുത്ത് തലക്കടിക്കുകയും ചെയ്തതെന്ന് വിഴിഞ്ഞം സി.ഐ പ്രജീഷ് ശശി അറിയിച്ചു.തുടയെല്ല് പൊട്ടി ശസ്ത്രക്രിയ നടത്തി കമ്ബി ഇട്ടിരുന്ന ശ്രീധരന്റെ കാലിന്റെ ഭാഗത്ത്‌ യുവതി ചവിട്ടുകയും ചെയ്തു. സഹോദരന് സ്വത്ത് കൂടുതല്‍ കൊടുത്തു എന്ന കാരണത്താല്‍ ഇവര്‍ ശ്രീധരനുമായി നിരന്തരം വഴക്കുണ്ടാക്കുക പതിവായിരുന്നതായി നാട്ടുകാര്‍ പറയുന്നു.
ശ്രീധരന്റെ പശുവിനെ അഴിച്ചുകൊണ്ടുപോയ സംഭവവും വൃക്ഷങ്ങള്‍ വെട്ടി വിറ്റ സംഭവങ്ങളും ഇതിനിടയില്‍ ഉണ്ടായിട്ടുള്ളതായി പൊലീസ് അറിയിച്ചു.എസ്.ഐ വിനോദ്, എ.എസ്.ഐ ചന്ദ്രലേഖ, കോണ്‍സ്റ്റബിള്‍ ഗീതു എന്നിവര്‍ ചേര്‍ന്നാണ് പ്രതിയെ പിടികൂടിയത്. പരിക്കേറ്റ ശ്രീധരന്‍ വിഴിഞ്ഞം സര്‍ക്കാര്‍ ആശുപത്രിയില്‍ ചികിത്സയിലാണ്