സ്വന്തമായി വാഹനം ഉള്ളവരാണോ നിങ്ങള്‍?; ഇക്കാര്യം ശ്രദ്ധിച്ചില്ലെങ്കില്‍ വണ്ടി കൈവിട്ട് പോകും; മുന്നറിയിപ്പുമായി എംവിഡി

തിരുവനന്തപുരം: വാഹനങ്ങളുടെ ഉടമസ്ഥാവകാശം കൈമാറ്റം ചെയ്യുന്നതുള്‍പ്പെടെയുള്ള സുപ്രധാന ഇടപാടുകളില്‍ ആര്‍.സി രേഖകള്‍ക്കൊപ്പം ആധാറുമായി ബന്ധിപ്പിച്ചിട്ടുള്ള മൊബൈല്‍ നമ്ബര്‍ കര്‍ശനമായി ചേര്‍ത്തിരിക്കണമെന്ന് മോട്ടോര്‍ വാഹന വകുപ്പ്.

ഉടമയുടെ അറിവോ സമ്മതമോ കൂടാതെയുള്ള വാഹനങ്ങളുടെ ഉടമസ്ഥാവകാശം കൈമാറ്റം ചെയ്യല്‍ ഇതുമൂലം തടയാൻ കഴിയുമെന്നും വാഹന രജിസ്ട്രേഷന്‍ ഉള്‍പ്പെടെയുള്ള സേവനങ്ങള്‍ക്ക് മൊബൈല്‍ നമ്ബര്‍ ചേര്‍ക്കേണ്ടത് നിര്‍ബന്ധമാണെന്നും അധികൃതര്‍ അറിയിച്ചു.

ഫേസ്ബുക്ക് പോസ്റ്റിന്റെ പൂര്‍ണരൂപം ഇങ്ങനെ…

നിങ്ങളുടെ മൊബൈല്‍ നമ്ബര്‍ ഇതുവരെ RC യില്‍ ചേര്‍ത്തില്ലേ..!?

വാഹനം നിങ്ങളറിയാതെ ഉടമസ്ഥത മാറ്റാതിരിക്കാനും നിങ്ങളുടെ വാഹനം നിങ്ങള്‍ അറിഞ്ഞു തന്നെ ഉടമസ്ഥത മാറ്റാനും നിങ്ങളുടെ ആധാറുമായി ലിങ്ക് ചെയ്ത മൊബൈല്‍ നമ്ബര്‍ PARIVAHAN സൈറ്റില്‍ വാഹന വിവരങ്ങള്‍ക്കൊപ്പം ചേര്‍ക്കണം. Tax അടക്കുക, രജിസ്ട്രേഷൻ പുതുക്കുക തുടങ്ങിയ സേവനങ്ങള്‍ ലഭ്യമാകാനും ഇപ്പോള്‍ മൊബൈല്‍ നമ്ബര്‍ അപ്ഡേറ്റ് ചെയ്തേ മതിയാകൂ… ഇതിനായി PARIVAHAN സൈറ്റില്‍ mobile number update മോഡ്യൂള്‍ സജ്ജീകരിച്ചിട്ടുണ്ട്. ഇപ്പോള്‍ വളരെ എളുപ്പത്തില്‍ ഇത് ഓണ്‍ലൈൻ ആയി പൂര്‍ത്തിയാക്കാം.

RC യിലെയും ആധാറിലെയും പേരും വിലാസവും തമ്മില്‍ അൻപത് ശതമാനത്തിലധികം വ്യത്യാസം ഉണ്ടെങ്കില്‍ ഈ മോഡ്യൂള്‍ വഴി ചെയ്യാൻ കഴിയണമെന്നില്ല. ഉദാ: RC, ആധാര്‍ എന്നിവയില്‍ ഉടമയുടെ പേര് യഥാക്രമം ‘ജോണ്‍ കുരിശിങ്കല്‍’ എന്നും ‘ജോണ്‍ കെ’ എന്നും ആണെങ്കില്‍ അത് വ്യത്യാസമായി കാണിച്ചേക്കാം.

ഇത്തരം സാഹചര്യത്തില്‍ തൊട്ടടുത്ത് കാണുന്ന ‘update mobile number done at RTO’ എന്ന മോഡ്യൂള്‍ വഴി രേഖകള്‍ അപ്‌ലോഡ് ചെയ്ത് R T ഓഫീസിലേക്ക് ഓണ്‍ലൈൻ ആയി നല്‍കി മൊബൈല്‍ നമ്ബര്‍ അപ്ഡേറ്റ് ചെയ്യാവുന്നതാണ്. ഇതിനായി വെള്ള പേപ്പറിലുള്ള ഒരു അപേക്ഷ, RC, mobile നമ്ബര്‍ ലിങ്ക് ചെയ്ത e-adhar എന്നിവ അപ്‌ലോഡ് ചെയ്ത് നല്‍കിയാല്‍ മതിയാകും.