ഗണേശ് കുമാറിന്റെ പരിഷ്കാരം ഫലം കണ്ടു , പ്രതിദിന വരുമാനത്തില്‍ റെക്കാര്‍ഡ് നേട്ടവുമായി കെഎസ്‌ആര്‍ടിസി; ഇന്നലെ മാത്രം കിട്ടിയത് ഭീമമായ തുക
തിരുവനന്തപുരം: പ്രതിദിന വരുമാനത്തില്‍ റെക്കാർഡ് നേട്ടവുമായി കെ എസ് ആർ ടി സി. ഇന്നലെ മാത്രം പത്ത് കോടിയിലധികം രൂപയുടെ വരുമാനമാണ് കെ എസ് ആർ ടി സിക്കുണ്ടായതെന്നാണ് കണക്കുകള്‍ വ്യക്തമാക്കുന്നത്
ഓണം അവധിക്ക് ശേഷമുള്ള ആദ്യ ദിനമായിരുന്നു ഇന്നലെ. മുമ്ബ് ശബരിമലയില്‍ നിന്ന് ഒരു ദിവസം ഒമ്ബത് കോടിയോളം രൂപ വരുമാനം ലഭിച്ചിരുന്നു. എന്നാല്‍ വരുമാനം പത്ത് കോടി പിന്നിടുന്നത് ആദ്യമായിട്ടാണ്. ഇത് ഒറ്റ ദിവസത്തെയല്ല, മറിച്ച്‌ ഏറെ നാളുകളായുള്ള അദ്ധ്വാനത്തിന്റെ ഫലമാണെന്നാണ് കെ എസ് ആർ ടി സി അധികൃതർ പറയുന്നത്.
പണ്ട് അയിരത്തോളം ബസുകള്‍ കട്ടപ്പുറത്താകാറുണ്ടായിരുന്നു. തകരാർ വന്നാല്‍ അത് പരിഹരിക്കാൻ ചിലപ്പോള്‍ മാസങ്ങളോ വർഷങ്ങളോ എടുത്തിരുന്നു. എന്നാല്‍ ഇന്ന് അതല്ല സ്ഥിതി. ഇപ്പോള്‍ കട്ടപ്പുറത്ത് കിടക്കുന്ന ബസുകളുടെ എണ്ണം നാനൂറില്‍ താഴെയാണത്രേ. കൂടുതല്‍ ബസുകള്‍ നിരത്തിലിറക്കി, കൂടുതല്‍ സർവീസുകള്‍ നടത്താൻ തുടങ്ങി, ഡിപ്പോകള്‍ക്ക് ടാർഗറ്റ് നല്‍കി അങ്ങനെ നിരവധി കാരണങ്ങള്‍ കൊണ്ടാണ് കെ എസ് ആർ ടി സിയുടെ വരുമാനം കൂടിയതെന്നാണ് അധികൃതർ സൂചിപ്പിക്കുന്നത്.