തിരുവനന്തപുരം: ആഭ്യന്തര കലഹം മൂര്ച്ഛിച്ച എല്.ജെ.ഡിയില് ഇന്ന് നിര്ണായക യോഗങ്ങള്.
ശ്രേയാംസ് വിഭാഗത്തിെന്റ യോഗം രാവിലെ കോഴിക്കോടും ഇതിനുശേഷം വിമതരുടെ യോഗം ആലപ്പുഴയിലും ചേരും. അതേസമയം, തങ്ങളാണ് ഔദ്യോഗിക പക്ഷമെന്ന അവകാശവാദവുമായി ഷേക് പി.ഹാരിസ് വിഭാഗം വെള്ളിയാഴ്ച എല്.ഡി.എഫ് കണ്വീനര്ക്ക് കത്ത് നല്കി.
നവംബര് 17 ലെ സംസ്ഥാന നേതൃയോഗ തീരുമാനപ്രകാരം എം.വി. ശ്രേയാംസ്കുമാറിന് പ്രസിഡന്റ് സ്ഥാനം ഒഴിയാന് നല്കിയ കാലാവധി ശനിയാഴ്ച അവസാനിക്കുമെന്ന് കത്തില് പറയുന്നു. ഇന്ന് ചേരുന്ന ശ്രേയാംസ് വിഭാഗത്തിെന്റ യോഗത്തില് തങ്ങളെ പുറത്താക്കിയാല് തങ്ങളും യോഗം ചേര്ന്ന് അച്ചടക്ക നടപടി പ്രഖ്യാപിക്കും. അണികള് ഭൂരിപക്ഷവും ഒപ്പമുള്ളതിനാല് എല്.ജെ.ഡി ഒൗദ്യോഗിക പക്ഷമായി തങ്ങളെ അംഗീകരിക്കണമെന്നും ഷേക് പി. ഹാരിസ് വിഭാഗം എ. വിജയരാഘവനോട് ആവശ്യപ്പെട്ടു.
രാഷ്ട്രീയ സാഹചര്യം വിശദീകരിച്ച് സി.പി.എം, സി.പി.െഎ സംസ്ഥാന സെക്രട്ടറിമാരായ കോടിയേരി ബാലകൃഷ്ണന്, കാനം രാജേന്ദ്രന് എന്നിവരെയും ഇവര് കണ്ടു. വിട്ടുവീഴ്ച ചെയ്ത് യോജിച്ച് പോകാന് ശ്രമിക്കണമെന്ന നിര്ദേശമാണ് കോടിയേരിയും വിജയരാഘവനും നല്കിയത്. ഭിന്നിച്ച് നില്ക്കുന്നത് മുന്നണിക്ക് പ്രശ്നം സൃഷ്ടിക്കുമെന്നും അവര് അറിയിച്ചു.