ന്യൂഡല്‍ഹി: ടിക്കറ്റ് റദ്ദാക്കുന്നതുമായി ബന്ധപ്പെട്ട് ഓണ്‍ലൈന്‍ ടിക്കറ്റ് ബുക്കിങ്ങില്‍ സുപ്രധാനമായ മാറ്റവുമായി ഇന്ത്യന്‍ റെയില്‍വേ രംഗത്ത് .പുതിയ തീരുമാനം അനുസരിച്ച്‌ ഇന്ത്യന്‍ റെയില്‍വേ വെബ്സൈറ്റിലൂടെയും ആപിലൂടേയും ബുക്ക് ചെയ്ത ടിക്കറ്റുകള്‍ റദ്ദാക്കിയാല്‍ ഉടനടി റീഫണ്ട് നല്‍കുമെന്നാണ് റെയില്‍വേ അധികൃതരുടെ പ്രഖ്യാപനം.
അതെ സമയം ടിക്കറ്റ് ബുക്ക് ചെയ്യുമ്ബോള്‍ ഐ.ആര്‍.ടി.സിയുടെ പേയ്മെന്‍റ് ഗേറ്റ്വേയായ ഐ.ആര്‍.ടി.സി- ഐപേ വഴി പണമടച്ചവര്‍ക്കാണ് അതിവേഗത്തില്‍ പണം തിരികെ ലഭിക്കുക. 2019 ലാണ് ഇന്ത്യന്‍ റെയില്‍വേ ഐ.ആര്‍.ടി.സി-ഐപേ സംവിധാനം അവതരിപ്പിച്ചത്. കേന്ദ്രത്തിന്‍റ ‘ഡിജിറ്റല്‍ ഇന്ത്യ’ കാമ്ബയിനിന്റെ ഭാഗമായിട്ടായിരുന്നു ഐപേയുടെ അവതരണം.
നിലവില്‍ ടിക്കറ്റ് ബുക്ക് ചെയ്തവര്‍ ഇത് റദ്ദാക്കുമ്ബോള്‍ റീഫണ്ട് ലഭിക്കാന്‍ രണ്ട് മുതല്‍ മൂന്ന് ദിവസം വരെ എടുക്കാറുണ്ട്. പുതിയ സംവിധാനം ട്രെയിന്‍ യാത്രക്കാര്‍ക്ക് ഗുണകരമാകുമെന്നാണ് പ്രതീക്ഷയെന്ന് ഇന്ത്യന്‍ റെയില്‍വേ വക്താവ് പ്രതികരിച്ചു . ഐ.ആര്‍.ടി.സി-ഐപേയുടെ യൂസര്‍ ഇന്‍റര്‍ഫേസില്‍ മാറ്റം വരുത്തിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു .