പാരിപ്പള്ളി: ഇരുചക്രവാഹനം മോഷണം നടത്തിയ പ്രതികള് മണിക്കൂറുകള്ക്കകം പൊലീസിന്റെ പിടിയിലായി. പാരിപ്പള്ളി മണ്ണയത് ചരുവിള പുത്തന്വീട്ടില് ചക്കരക്കുട്ടന് എന്ന ഹരീഷ് (18), വിലവൂര്ക്കോണത്ത് നിഥിഷ് ഭവനത്തില് ഇട്ടൂപ്പി എന്ന മാഹിന്ലാല് (20) എന്നിവരാണ് പാരിപ്പള്ളി പൊലീസിന്റെ പിടിയിലായത്പരിപ്പള്ളി വേളമാനൂര് വിഷ്ണുമുകുന്ദത്തില് ആദര്ശിന്റെ ഇരുചക്രവാഹനമാണ് കഴിഞ്ഞ 17ന് രാത്രിയില് വീട്ടില് നിന്ന് മോഷണം പോയത്. ആദര്ശിന്റെ പരാതിയില് പാരിപ്പള്ളി പൊലീസ് കേസ് രജിസ്റ്റര് ചെയ്ത് വീട്ടിലും പരിസരപ്രദേശങ്ങളിലും റോഡുകളിലെ സി.സി.ടി.വി ദൃശ്യങ്ങള് ഉള്പ്പെടെ പരിശോധിച്ചാണ് പ്രതികളെ തിരിച്ചറിഞ്ഞത്.
പ്രതികള് ഇരുവരും മുമ്ബും കേസുകളില് ഉള്പ്പെട്ടവരാണ്. മഹിലാല് 2021ല് മോഷണക്കേസില് പ്രതിയാണ്, ഹരീഷ് പീഡനമുള്പ്പെടെയുള്ള പോക്സോ കേസിലും പ്രതിയാണ്.ജില്ല പൊലീസ് മേധാവി ടി. നാരായണന്റെ നിര്ദേശാനുസരണം ചാത്തന്നൂര് അസി. കമീഷണര് ബി. ഗോപകുമാറിന്റെ മേല്നോട്ടത്തില് പാരിപ്പള്ളി ഇന്സ്പെക്ടര് അല്ജബാറിന്റെ നേതൃത്വത്തില് എസ്.ഐ മാരായ കെ. സുരേഷ്കുമാര്, ബി. സുരേഷ്കുമാര്, സി.പി.ഒമാരായ നൗഷാദ് റാവുത്തര്, എസ്. നൗഷാദ് എന്നിവരടങ്ങിയ സംഘമാണ് പ്രതികളെ പിടികൂടിയത്. ഇവരെ കോടതിയില് ഹാജരാക്കി റിമാന്ഡ് ചെയ്തു