കടം വാങ്ങിയോ, സ്ഥലം വിറ്റോ എന്നെ ചികിത്സിക്കാമോ? ജോലി കിട്ടുമ്പോള്‍ വീട്ടാം; ഈ ഫോട്ടോ ഫ്ലക്സ് വയ്ക്കണം’; നൊമ്പരമായി മാറിയ ഫേസ്ബുക്ക് കുറിപ്പ്.
സോഷ്യല്‍ മീഡിയയില്‍ വൈറലാകുന്ന പല കുറിപ്പുകളും ചിലപ്പോള്‍ വായിക്കുന്നവരെയും ആഴത്തില്‍ വേദനിപ്പിക്കാറുണ്ട്. അത്തരത്തിലുള്ള ഒരു കുറിപ്പാണ് ഇപ്പോല്‍ സോഷ്യല്‍ മീഡിയയില്‍ വൈറലാകുന്നത്.
കാൻസർ ബാധിച്ച്‌ മരിച്ച യുവതിയുടെ അവസാന ആഗ്രഹം പറഞ്ഞുള്ള ഒരു കുറിപ്പാണ് സൈബർ ലോകത്ത് വേദനയായി മാറിയത്. ഷാജി കെ മാത്തൻ എന്നയാളാണ് സഹോദരിയുടെ മകളുടെ വിയോഗത്തെപ്പറ്റി ഫേസ്ബുക്കില്‍ കുറിപ്പ് പങ്കുവച്ചത്.
കാൻസർ ബാധിച്ചാണ് 26 കാരി സ്നേഹ അന്ന ജോസ് മരിച്ചത്. അസുഖം ചെറുതല്ലെന്നറിഞ്ഞിട്ടും പുഞ്ചിരിയോടെ സ്നേഹ നേരിട്ടു. എഞ്ചിനിയറിങ്ങ് അവസാന വർഷമെത്തുമ്ബോള്‍ അസുഖബാധിതയായിട്ടും 90% ലധികം മാർക്ക് നേടിയെന്നും. ഗൂഗിളില്‍ കയറി മരുന്നുകളും, ചികിത്സകളും മനസിലാക്കി അപ്പനോട് സംസാരിക്കുമെന്നും സനേഹ പറയുമെന്ന് കുറിപ്പില്‍ പറയുന്നു. വസ്തുവിറ്റോ, കടം വാങ്ങിയോ ചികില്‍സകള്‍ നടത്തണം. രോഗം മാറി ജോലിയില്‍ കയറിയാല്‍ കടങ്ങളെല്ലാം വീട്ടാം. എന്നാല്‍ രണ്ട് തവണ രോഗം സ്നേഹയെ ബാധിച്ചു. ചികില്‍സകള്‍ വിഫലമായ ഘട്ടത്തില്‍ ബാക്കിയുള്ള ചില ആഗ്രഹങ്ങളും അപ്പനെ അറിയിച്ചു. മരിക്കുമ്ബോള്‍ പത്രത്തില്‍ വാർത്ത നല്‍കണമെന്ന് അതിനൊപ്പം ചേർക്കേണ്ട ചിത്രം തിരഞ്ഞെടുത്തു നല്‍കിക്കൊണ്ട് അവള്‍ പറഞ്ഞു. ഫ്ളെക്സ് വയ്ക്കുന്നെങ്കില്‍ അതിലും ഇതേ ഫോട്ടോ ഉള്‍പ്പെടുത്തണം. അന്ത്യയാത്രയ്ക്ക് ഒരുക്കുമ്ബോള്‍ പുതിയ സെറ്റ് ഉടുപ്പിക്കണം. ചുറ്റും റോസാപ്പൂക്കള്‍ വയ്ക്കണമെന്നും സ്നേഹ അപ്പനോട് പറഞ്ഞതായി കുറിപ്പില്‍ പറയുന്നു.
ഫേസ്ബുക്ക് പോസ്റ്റിന്റെ പൂർണ രൂപം
ഈ ഫോട്ടോ വേണം പത്രത്തില്‍ കൊടുക്കുവാൻ….ഇത് എൻ്റെ സ്നേഹമോള്‍..
എൻ്റെ സഹോദരി ഷീജയുടെ
ഒരേയൊരു മകള്‍..
സ്നേഹയെന്ന പേരു തിരഞ്ഞെടുത്തത് ഞാനായിരുന്നു.
പേരുപോലെ തന്നെ സ്നേഹവും, അച്ചടക്കവും, വിനയവുമുള്ളവള്‍.
പത്താംതരം വരെ പഠനത്തില്‍ മെല്ലെപ്പോക്ക്.
പിന്നീടവള്‍ സ്വപ്നം കാണുവാൻ തുടങ്ങി..
11, 12 ല്‍ മികച്ച മാർക്കുകള്‍,
എഞ്ചിനിയറിങ്ങ് അവസാന വർഷമെത്തുമ്ബോള്‍ അസുഖബാധിതയായിട്ടും 90% ലധികം മാർക്ക്.
അവളെ പിടികൂടിയ അസുഖം ചെറുതല്ല ന്നറിഞ്ഞിട്ടും അവള്‍ പുഞ്ചിരിച്ചു.
ഗൂഗിളില്‍ കയറി മരുന്നുകളും, ചികിത്സകളും മനസിലാക്കി അപ്പനോട് പറഞ്ഞു വസ്തുവിറ്റോ, കടം വാങ്ങിയോ എന്നെ ചികിത്സിക്കാമോ ..
ജോലി കിട്ടുമ്ബോള്‍ ഞാൻ വീട്ടാം.
അങ്ങനെ മജ്ജ മാറ്റിവെച്ചു…
ശേഷം അവള്‍ സ്വപ്നം കണ്ട ചെറിയ ജോലിയില്‍ കയറി .
ചെറുചിരികളുമായി സന്തോഷം പങ്കിട്ടു പോന്നപ്പോള്‍
രണ്ടര വർഷത്തിനു ശേഷം അവളെ തേടി വീണ്ടുമതെ അസുഖമെത്തി…
ചില ക്യാൻസറങ്ങനെയാണ്.
രണ്ടാമതും മജ്ജ മാറ്റിവെച്ചു..
അവള്‍ക്കായി എല്ലാ ചികിത്സകളും ചെയ്തു
ഇന്നിപ്പോള്‍ എല്ലാം വിഫലം..
ഇനിയും കുറച്ച്‌ ആഗ്രഹങ്ങള്‍ ബാക്കിയുണ്ട്.പത്രത്തില്‍ കൊടുക്കേണ്ടതായ ഫോട്ടോ ഇതായിരിക്കണം..ഫ്ലക്സ് വെക്കുകയാണങ്കില്‍ ഈ ഫോട്ടോ തന്നെ വേണം..പുതിയ സെറ്റ് ഉടുപ്പിക്കണം.. ചുറ്റും റോസാ പൂക്കള്‍ വേണം..ഇനി ഞങ്ങള്‍ക്ക് ചെയ്തു തീർക്കുവാൻ നിൻ്റെ കൊച്ചു കൊച്ചു സ്വപ്നങ്ങള്‍ മാത്രം..
ധാരാളം മെസേജുകളും, വിളികളും വരുന്നതിനാല്‍
വ്യക്തമായ ഒരു പോസ്റ്റിടുകയാണ്…
ഫോണെടുക്കുവാൻ പലപ്പോഴും കഴിയാറില്ല…
ക്ഷമിക്കുക.
