‘ചെന്നിത്തല ഒന്ന് മാന്തിയാല്‍ അതില്‍ കയറി കൊത്താനൊന്നും തന്നെ കിട്ടില്ല, രമേശ് കോണ്‍ഗ്രസ് നോക്കിയാല്‍ മതി’ ചെന്നിത്തലക്ക് മറുപടിയുമായി ബിനോയ് വിശ്വം
തിരുവനന്തപുരം: രമേശ് ചെന്നിത്തലയുടെ വിമർശനത്തിനെതിരെ മറുപടിയുമായി സിപിഐ സംസ്ഥാന സെക്രട്ടറി ബിനോയ് വിശ്വം. ‘രമേശ് ഒന്ന് മാന്തിയാല്‍ അതില്‍ കയറി കൊത്താനൊന്നും തന്നെ കിട്ടില്ലെന്നും, ചെന്നിത്തല കോണ്‍ഗ്രസ് നോക്കിയാല്‍ മതിയെന്നുമാണ്’ ബിനോയ് വിശ്വം പറഞ്ഞത്.
എല്‍ഡിഎഫിനെ കുറിച്ച്‌ പറയാനുള്ള അർഹത കോണ്‍ഗ്രസ്സിനില്ലെന്നും കോണ്‍ഗ്രസ് പാർട്ടിയുടെ അവസ്ഥ എന്താണെന്നും ബിനോയ് ചോദിച്ചു. സതീശനും രമേശനും സുധാകരനുമൊക്കെ ഒന്നിച്ച്‌ നില്‍ക്കാൻ തന്നെ ബുദ്ധിമുട്ടാനാണ്, അത്തരമൊരു പാർട്ടി എല്‍ഡിഎഫിനെ പഠിപ്പിക്കാൻ വരേണ്ടെന്നാണ് ബിനോയ് മാധ്യമങ്ങളോട് പറഞ്ഞത്. ‘മദ്യം നിർമിക്കുന്നതിന് എല്‍ഡിഎഫ് എതിരല്ല. കുടിവെള്ളത്തിനേയും കൃഷിയെയും ബാധിക്കുന്ന മദ്യനിർമാണം വേണ്ട എന്നതിലാണ് എല്‍ഡിഎഫില്‍ ഭിന്നിപ്പുണ്ടായത്. ഇത് രണ്ടിനെയും ബാധിക്കാത്ത തരത്തില്‍ പദ്ധതി നടപ്പിലാക്കാനാണ് എല്‍ഡിഎഫ് തീരുമാനം. ഇതില്‍ പരിശോധനയും ഉണ്ടാവും.’ ബിനോയ് വിശ്വം വ്യക്തമാക്കി.
മണിക്കൂറുകള്‍ക്ക് മുൻപാണ് ബ്രൂവറി വിഷയത്തില്‍ ‘സിപിഐ സംസ്ഥാന സെക്രട്ടറിയുടെ വാ മുഖ്യമന്ത്രി അടപ്പിച്ചു’ എന്ന പരാമർശവുമായി ചെന്നിത്തല എത്തിയത്. ബിനോയ് വിശ്വത്തിന്റെ വാക്കിന് ഒരു വിലയുമില്ലാതായെന്നും പഴയ സിപിഐ- അല്ല ഇപ്പോഴത്തെ സിപിഐയെന്നും രമേശ് ചെന്നിത്തല പറഞ്ഞു.
