ന്യൂഡല്‍ഹി: 12 എം.പിമാരുടെ സസ്പെന്‍ഷന്‍ വിഷയം ചര്‍ച്ച ചെയ്യാന്‍ കേന്ദ്ര പാര്‍ലമെന്‍ററി കാര്യ മന്ത്രി പ്രഹ്ലാദ് ജോഷി യോഗം വിളിച്ചു.
സസ്പെന്‍ഷനിലായ എം.പിമാരുടെ പാര്‍ട്ടി സഭ നേതാക്കളെയാണ് യോഗത്തിലേക്ക് ക്ഷണിച്ചിരിക്കുന്നത്.
രാജ്യസഭയിലെ ബി.ജെ.പി നേതാവ് മന്ത്രി പിയൂഷ് ഗോയലും പെങ്കടുക്കും. അതേസമയം, യോഗത്തില്‍ പെങ്കടുക്കണമോ എന്ന കാര്യം തിങ്കളാഴ്ച രാവിലെ 9.45നു ചേരുന്ന പ്രതിപക്ഷ നേതാക്കളുടെ യോഗം തീരുമാനിക്കും. വിഷയത്തില്‍ സമവായത്തിലെത്താന്‍ ഭരണപക്ഷത്തോടും പ്രതിപക്ഷത്തോടും രാജ്യസഭ ചെയര്‍മാന്‍ വെങ്കയ്യ നായിഡു ആവശ്യപ്പെട്ടിരുന്നു.
ഇതിെന്‍റ തുടര്‍ച്ചയെന്നോണമാണ് പാര്‍ലമെന്‍റ് സമ്മേളനത്തിന് അഞ്ചു പ്രവൃത്തി ദിനങ്ങള്‍ മാത്രം ബാക്കി നില്‍ക്കേ പ്രശ്നപരിഹാരത്തിനുള്ള സര്‍ക്കാര്‍ ശ്രമം. മുഴുവന്‍ പ്രതിപക്ഷ നേതാക്കളെയും വിളിക്കുന്നതിനു പകരം സസ്പെന്‍ഷനിലായ എം.പിമാരുടെ സഭ നേതാക്കളെ മാത്രം ചര്‍ച്ചക്ക് വിളിച്ചതില്‍ പ്രതിഷേധമുയര്‍ന്നിട്ടുണ്ട്.
ഇതു പ്രതിപക്ഷത്തെ ഭിന്നിപ്പിക്കാനുള്ള തന്ത്രമാണെന്ന് പല നേതാക്കളും കരുതുന്നു. ഇതുസംബന്ധിച്ച്‌ തിങ്കളാഴ്ച രാജ്യസഭ പ്രതിപക്ഷ നേതാവ് മല്ലികാര്‍ജുന്‍ ഖാര്‍ഗെ വിളിച്ച യോഗത്തില്‍ ചര്‍ച്ച ചെയ്യും. വിഷയത്തില്‍ തൃണമൂല്‍ കോണ്‍ഗ്രസ് സ്വന്തം നിലപാടെടുക്കും. എം.പിമാര്‍ സസ്പെന്‍ഷനിലായിട്ടും പ്രതിപക്ഷവുമായി സഹകരിക്കാതെ മുന്നോട്ട് പോവുകയാണ് തൃണമൂല്‍.
സസ്പെന്‍ഷനിലായ അംഗങ്ങള്‍ മാപ്പുപറയണമെന്നാണ് സര്‍ക്കാര്‍ ആവശ്യം. അതിനു തയാറല്ലെന്ന് എം.പിമാരും വ്യക്തമാക്കുന്നു. സസ്പെന്‍ഷനിലായ എം.പിമാര്‍ പാര്‍ലമെന്‍റിലെ ഗാന്ധിപ്രതിമക്കു മുന്നില്‍ ധര്‍ണ തുടരുകയാണ്.