തിരുവനന്തപുരം: വിദ്യാര്‍ഥികള്‍ക്ക് മൊബൈല്‍ വാങ്ങാന്‍ പലിശരഹിത വായ്പക്ക് തുടക്കം കുറിച്ചതായും നെല്ല് സംഭരണത്തിനും സംസ്കരണത്തിനുമായി ആഗസ്റ്റില്‍ സഹകരണ കണ്‍സോര്‍ട്യം ആരംഭിക്കുമെന്നും മന്ത്രി വി.എന്‍. വാസവന്‍ അറിയിച്ചു. ഒന്നു മുതല്‍ 12 വരെ ക്ലാസുകളിലേക്ക് ഓണ്‍ലൈന്‍പഠനത്തിന് മൊബൈല്‍ ഫോണ്‍ വാങ്ങാന്‍ സഹകരണസംഘങ്ങള്‍, ബാങ്കുകള്‍ എന്നിവ വഴി പലിശരഹിതവായ്പ അനുവദിക്കുന്ന പദ്ധതി കേരള ബാങ്ക് വഴിയും ലഭ്യമാക്കും. 8000 വായ്പയാണ് ലക്ഷ്യം.
സംസ്ഥാനത്താകെ അധികാരപരിധിയുള്ള പുതിയ നെല്ല് സഹകരണ സംഘം രൂപവത്കരിക്കും. പാലക്കാട് റൈസ്മില്‍ മാതൃകയില്‍ രണ്ട് ആധുനിക റൈസ്മില്‍ സ്ഥാപിക്കും. ആരോഗ്യപ്രശ്നങ്ങളുള്ള സഹകാരികള്‍ക്ക് അടിയന്തരസഹായം ലഭ്യമാക്കാനായി കേരള സഹകരണ അംഗ സമാശ്വാസനിധി പദ്ധതിക്ക് രൂപം നല്‍കി.