തിരുവനന്തപുരം: പൂഞ്ഞാര് സെന്റ് മേരീസ് പള്ളിക്ക് മുന്നില് കെ.എസ്.ആര്.ടി.സി ബസ് വെള്ളക്കെട്ടില് മുങ്ങി സംഭവത്തില് ഡ്രൈവറെ ഗതാഗത വകുപ്പ് സസ്പെന്ഡ് ചെയ്തു. ഈരാറ്റുപേട്ട ഡിപ്പോയിലെ ഡ്രൈവര് എസ്. ജയദീപിനെയാണ് സസ്പെന്ഡ് ചെയ്തത്.
ശക്തമായ മഴയെ തുടര്ന്ന് പൂഞ്ഞാര് സെന്റ് മേരീസ് പള്ളിക്കുമുന്നില് രൂപപ്പെട്ട വലിയ വെള്ളക്കെട്ടിലൂടെ ഇദ്ദേഹം ബസ് ഓടിച്ചത്. യാത്രക്കാരുടെ ജീവന് ഭീഷണിയും ബസിന് നാശനഷ്ടവും വരുത്തിയ ഡ്രൈവറെ സസ്പെന്ഡ് ചെയ്യാന് ഗതാഗത മന്ത്രി ആന്റണി രാജുവാണ് നിര്ദേശം നല്കിയത്.
ഈരാറ്റുപേട്ടക്ക് പോകുന്ന ബസ് പള്ളിക്ക് മുന്നിലെ വലിയ വെള്ളക്കെട്ട് കടക്കാന് ശ്രമിക്കുന്നതിനിടെയാണ് പകുതിയോളം മുങ്ങിയത്. യാത്രക്കാരെ നാട്ടുകാര് രക്ഷപ്പെടുത്തി. പിന്നാലെ വടം കെട്ടി ബസ് വെള്ളക്കെട്ടില് നിന്ന് വലിച്ചുകയറ്റുകയായിരുന്നു.
രക്ഷക്കായി സൈന്യം രംഗത്ത്
തിരുവനന്തപുരം: ഉരുള്പൊട്ടലിലും പ്രകൃതി ദുരന്തങ്ങളിലും രക്ഷാപ്രവര്ത്തനം നടത്തുന്നതിന് സൈന്യവും രംഗത്തെത്തി. കരസേനയുടെ രണ്ടു സംഘത്തെ സംസ്ഥാനത്ത് വിന്യസിച്ചു. ഉരുള്പൊട്ടലില് ഒറ്റപ്പെട്ട കൂട്ടിക്കല് മേഖലയിലെ രക്ഷാപ്രവര്ത്തനത്തിലാണ് ഒരു സംഘം. സര്ക്കാറിെന്റ അഭ്യര്ഥന പ്രകാരം പാങ്ങോട് മിലിട്ടറി സ്റ്റേഷനിലെ മേജര് അബിന് പോളിെന്റ നേതൃത്വത്തിലുള്ള 35 അംഗ സംഘമാണ് ശനിയാഴ്ച വൈകുന്നേരത്തോടെ കാഞ്ഞിരപ്പള്ളിയില് എത്തിയത്.
എം.ഐ 17, സാരംഗ് ഹെലികോപ്റ്ററുകളും രക്ഷാപ്രവര്ത്തനത്തിനുണ്ട്. ആവശ്യമെങ്കില് കൂടുതല് ഹെലികോപ്റ്ററുകള് ഇറക്കും. മറ്റൊരു യൂനിറ്റിനെ തിരുവനന്തപുരത്തും വിന്യസിച്ചു. ഏത് അടിയന്തര സാഹചര്യവും നേരിടാന് വ്യോമസേനയും സജ്ജമാണ്. ദേശീയ ദുരന്ത പ്രതികരണസേനയുടെ ആറ് സംഘങ്ങളെ പത്തനംതിട്ട, ആലപ്പുഴ, ഇടുക്കി, എറണാകുളം, തൃശൂര്, മലപ്പുറം ജില്ലകളില് വിന്യസിച്ചു. ഡിഫന്സ് സെക്യൂരിറ്റി കോര്പ്സിെന്റ രണ്ടു ടീമുകള് കണ്ണൂരിലും കോഴിക്കോട്ടുമുണ്ട്. കേരളത്തിലെ കാലാവസ്ഥ കണക്കിലെടുത്ത് ദക്ഷിണ വ്യോമ കമാന്ഡിന് കീഴിലെ എല്ലാ താവളങ്ങളും അതീവ ജാഗ്രതയിലാണ്.