ഇടുക്കി; മുല്ലപ്പെരിയാര്‍ ഡാമിലെ ജലനിരപ്പ് വീണ്ടും ഉയര്‍ന്നു. 137 അടി കവിഞ്ഞു. ഒരടി കൂടി ഉയര്‍ന്നാല്‍ തമിഴ്‌നാട് സര്‍ക്കാര്‍ കേരളത്തിന് രണ്ടാമത്തെ അറിയിപ്പ് നല്‍കും. 142 അടിയാണ് പരമാവധി സംഭരണ ശേഷി. സെക്കന്‍ഡില്‍ 5700 ഘനയടി വെള്ളം ഡാമിലേക്ക് ഒഴുകിയെത്തുന്നുണ്ട്. 2200 ഘനയടി വെള്ളമാണ് തമിഴ്‌നാട് കൊണ്ടുപോകുന്നത്.
പകല്‍ നീരൊഴുക്ക് കുറഞ്ഞിരുന്നുവെങ്കിലും വൈകിട്ടോടെ കാടിനുള്ളില്‍ പെയ്ത മഴയാണ് നിരക്ക് ജലനിരപ്പ് ഉയരാനിടയാക്കിയത്. പീരുമേട് താലൂക്കില്‍ രണ്ട് കണ്‍ട്രോള്‍ റൂമുകള്‍ തുറന്നു. മുല്ലപ്പെരിയാര്‍ ഡാം തുറക്കേണ്ടി വന്നാല്‍ മാറ്റിപ്പാര്‍പ്പിക്കേണ്ടവരുടെ ലിസ്റ്റ് തയ്യാറാക്കുകയും ഇവര്‍ക്ക് ബോധവത്കരണം നല്‍കുകയും ചെയ്തു.
അതേസമയം,മുല്ലപ്പെരിയാര്‍ ഡാമിലെ ജലനിരപ്പ് 139 അടിയായി ക്രമീകരിക്കണമെന്ന് കേരളം. ഇതിനായി സുപ്രിം കോടതിയില്‍ ഇന്ന് അപേക്ഷ നല്‍കും. നിലവില്‍ ആശങ്കപ്പെടേണ്ട സാഹചര്യമില്ലെന്ന് ചീഫ് സെക്രട്ടറി വി.പി ജോയ് വ്യക്തമാക്കി. മുല്ലപ്പെരിയാര്‍ ഡാമിലെ ജലനിരപ്പ് 137 അടി കവിഞ്ഞ സാഹചര്യത്തിലാണ് സുപ്രിം കോടതിയെ സമീപിക്കുന്നത്..ഡാമിലെ പരമാവധി ജലസംഭരണ ശേഷി 139 അടിയായി ക്രമീകരിക്കണമെന്നതാണ് കേരളത്തിന്റെ ആവശ്യം. മുല്ലപ്പെരിയാറുമായി ബന്ധപ്പെട്ട പൊതുതാല്‍പര്യ ഹരജികള്‍ ഇന്ന് സുപ്രിം കോടതി പരിഗണിക്കുന്നുണ്ട്. അതിനിടെ ടണല്‍ വഴി വെള്ളം കൊണ്ടുപോകുന്നത് തമിഴ്‌നാട് പൂര്‍ണതോതിലാക്കി. 2200 ക്യുസെക്‌സ് ജലമാണ് തമിഴ്‌നാട് ടണല്‍ വഴി കൊണ്ടുപോകുന്നത്. നേരത്തെ ഇത് 1300 ക്യുസെക്ക്‌സ് മാത്രമായിരുന്നു.
ഡാമിലെ ജലനിരപ്പ് 138 അടിയിലെത്തിയാല്‍ കേരളത്തിന് തമിഴ്‌നാട് രണ്ടാമത്തെ മുന്നറിയിപ്പ് നല്‍കും. 142 അടിയാണ് ഡാമിലെ പരമാവധി സംഭരണ ശേഷി. അതേസമയം സ്പില്‍വേ ഷട്ടറുകള്‍ ഉയര്‍ത്തി അധികജലം പുറത്തേയ്ക്ക് ഒഴുക്കേണ്ട സാഹചര്യമുണ്ടായാല്‍ 24 മണിക്കൂര്‍ മുന്‍പ് തന്നെ മുന്നറിയിപ്പ് നല്‍കാന്‍ തമിഴ്‌നാട് സര്‍ക്കാരിനോട് കേരളം ആവശ്യപ്പെട്ടിട്ടുണ്ട്.സ്ഥിതിഗതികള്‍ നിരീക്ഷിക്കാന്‍ കേരളം ഉദ്യോഗസ്ഥരെ ചുമതലപ്പെടുത്തി. നിലവില്‍ ആശങ്കപ്പെടേണ്ട സാഹചര്യമില്ലെന്ന് ചീഫ് സെക്രട്ടറി വി.പി ജോയ് വ്യക്തമാക്കി.
അതേസമയം,മുല്ലപ്പെരിയാര്‍ അണക്കെട്ടിലെ ജലനിരപ്പുമായി ബന്ധപ്പെട്ട പൊതുതാല്‍പര്യ ഹരജികള്‍ സുപ്രീം കോടതി ഇന്ന് പരിഗണിക്കും. അണക്കെട്ടിന്റെ ബലപ്പെടുത്തല്‍ നടപടികളില്‍ തമിഴ്‌നാട് വീഴ്ച വരുത്തിയെന്നും കരാര്‍ ലംഘനമുണ്ടായെന്നും കാണിച്ച് പബ്ലിക് ചാരിറ്റബിള്‍ ട്രസ്റ്റും അണക്കെട്ടിന്റെ സുരക്ഷ വിലയിരുത്താന്‍ രൂപീകരിച്ച മേല്‍നോട്ട സമിതി ഉത്തരവാദിത്തങ്ങളില്‍ നിന്ന് ഒളിച്ചോടുകയാണെന്ന് കാണിച്ച് ഡോ ജോ ജോസഫുമാണ് ഹരജി നല്‍കിയിരിക്കുന്നത്. ജസ്റ്റിസ് എ.എം ഖാന്‍വില്‍ക്കര്‍ അധ്യക്ഷനായ ബെഞ്ചാണ് ഹരജി പരിഗണിക്കുക