ആലപ്പുഴ: കുറ്റകൃത്യങ്ങള്ക്ക് ഉപയോഗിക്കുന്ന വാഹനങ്ങളുടെ പെര്മിറ്റും ആ വാഹനത്തില് സഞ്ചരിച്ച വ്യക്തികളുടെ ഡ്രൈവിങ് ലൈസന്സ് റദ്ദാക്കപ്പെടുകയും ചെയ്യുമെന്ന് ഗതാഗത മന്ത്രി ആന്റണി രാജു. വാഹനങ്ങള് ഉപയോഗിച്ചുള്ള കുറ്റകൃത്യങ്ങള് വര്ധിക്കുന്ന സാഹചര്യത്തിലാണ് നടപടിയെന്ന് മന്ത്രി വ്യക്തമാക്കി.
നിലവില് മോട്ടോര് വാഹന നിയമപ്രകാരമുള്ള കുറ്റകൃത്യങ്ങള്ക്ക് മാത്രമാണ് ലൈസന്സും പെര്മിറ്റും റദ്ദാക്കുന്ന നടപടി സ്വീകരിക്കുന്നത്. സംസ്ഥാനത്ത് ഇപ്പോള് വിതരണം ചെയ്യുന്ന ഡ്രൈവിങ് ലൈസന്സ് കാര്ഡിന് പകരം എലഗന്റ് കാര്ഡുകള് മെയ് മാസത്തില് വിതരണം ചെയ്ത് തുടങ്ങുമെന്ന് മന്ത്രി പറഞ്ഞു.
വാഹനം ഓടിക്കുമ്പോഴുള്ള മൊബൈല് ഫോണ് ഉപയോഗവും, ഹെല്മറ്റ് ധരിക്കാതെ ഇരുചക്രവാഹനങ്ങളില് സഞ്ചരിക്കുന്നതും സീറ്റ് ബെല്റ്റ് ഉപയോഗിക്കാതെ യാത്ര ചെയ്യുന്നതും കണ്ടെത്തി മോട്ടോര് വാഹന നിയമപ്രകാരമുള്ള ശക്തമായ നടപടി സ്വീകരിക്കുന്നതിനായി അടുത്ത മൂന്ന് മാസക്കാലയളവില് സ്പെഷ്യല് ഡ്രൈവുകള് സംഘടിപ്പിക്കുവാന് തീരുമാനിച്ചതായും മന്ത്രി അറിയിച്ചു