അഡ്മിനിസ്ട്രേറ്ററുടെ ജനവിരുദ്ധ നയങ്ങള്‍ക്കെതിരെ ചാനല്‍ ചര്‍ച്ചകളില്‍ സജീവമായി പങ്കെടുക്കുന്ന ലക്ഷദ്വീപ് സ്വദേശിനിയും സിനിമപ്രവര്‍ത്തകയുമായ ആയിഷ സുല്‍ത്താനയെ രാജ്യദ്രോഹ കേസില്‍ കുടുക്കിയതിന് പിന്നില്‍ ബി.ജെ.പി ഗൂഢാലോചന. ഇതുസംബന്ധിച്ച്‌ ലക്ഷദ്വീപ് ബി.ജെ.പി വൈസ് പ്രസിഡന്‍റ് കെ.പി. മുത്തുക്കോയയും ദ്വീപിെന്‍റ ചുമതലയുള്ള ദേശീയ വൈസ് പ്രസിഡന്‍റ് എ.പി. അബ്ദുല്ലക്കുട്ടിയും തമ്മില്‍ നടത്തിയ സംഭാഷണം പുറത്തായി.
ആയിഷയുടെ പരാമര്‍ശം നമുക്ക് ദൈവം തന്ന അവസരമാണെന്നും അത് ഉപയോഗപ്പെടുത്തണമെന്നും മുത്തുക്കോയ ഇതില്‍ പറയുന്നു. ലക്ഷദ്വീപ് സംസ്കാരവുമായി ഒരുബന്ധവുമില്ലാത്ത ആളാണ് അവര്‍. അതുകൊണ്ട് ഇത് ഉപയോഗപ്പെടുത്തണമെന്നും മുത്തുക്കോയ കൂട്ടിച്ചേര്‍ക്കുന്നു. വിഷയം വേണ്ടവിധത്തില്‍ എടുക്കണമെന്നും നല്ല വാര്‍ത്തപ്രാധാന്യം കിട്ടുമെന്നുമായിരുന്നു അബ്ദുല്ലക്കുട്ടിയുടെ മറുപടി. ഇതിനുേശഷമാണ് ലക്ഷദ്വീപ് ബി.ജെ.പി പ്രസിഡന്‍റ് സി. അബ്ദുല്‍ ഖാദര്‍ ഹാജിയുടെ പരാതിയില്‍ കവരത്തി പൊലീസ് രാജ്യദ്രോഹക്കുറ്റത്തിന് കേസെടുത്തത്.