‘അടുത്തത് സീതാ ക്ഷേത്രം’: തെരഞ്ഞെടുപ്പിന് മുന്നോടിയായി ബീഹാര്‍ രാഷ്ട്രീയം ഇളക്കി മറിച്ച്‌ അമിത് ഷാ
ന്യൂഡല്‍ഹി : ഈ വർഷം ഒക്‌ടോബർ-നവംബർ മാസങ്ങളില്‍ നടക്കാനിരിക്കുന്ന ബിഹാർ നിയമസഭാ തിരഞ്ഞെടുപ്പിന് തയ്യാറെടുക്കുന്ന ഭരണകക്ഷിയായ ബി.ജെ.പി മിഥില മേഖലയിലെ സീതാമർഹിയിലെ സീതാക്ഷേത്രത്തിൻ്റെ നവീകരണവും പുനരുദ്ധാരണവും തങ്ങളുടെ പ്രധാന തിരഞ്ഞെടുപ്പ് വിഷയങ്ങളിലൊന്നാക്കി മാറ്റാൻ നോക്കുകയാണ്
ബിജെപിയുടെ ഈ നീക്കം സംസ്ഥാനത്തെ രാഷ്ട്രീയ സ്പെക്‌ട്രത്തില്‍ നിന്ന് രൂക്ഷമായ പ്രതികരണങ്ങള്‍ക്ക് കാരണമായിട്ടുണ്ട്
പ്രധാന പ്രതിപക്ഷമായ രാഷ്ട്രീയ ജനതാദള്‍(ആർ.ജെ.ഡി) ഇതിനെ വിമർശിച്ചപ്പോള്‍, മുഖ്യമന്ത്രി നിതീഷ് കുമാറിൻ്റെ നേതൃത്വത്തിലുള്ള ബി.ജെ.പിയുടെ പ്രധാന സഖ്യകക്ഷിയായ ജനതാദള്‍ (യുണൈറ്റഡ്) പദ്ധതിക്ക് കൂടുതല്‍ കേന്ദ്ര ഫണ്ട് ആവശ്യപ്പെട്ടിട്ടുണ്ട്.
കഴിഞ്ഞ ഞായറാഴ്ച അഹമ്മദാബാദില്‍ നടന്ന “ശാശ്വത് മിഥില മഹോത്സവ് 2025” പരിപാടിയെ അഭിസംബോധന ചെയ്തുകൊണ്ട് കേന്ദ്ര ആഭ്യന്തര മന്ത്രി അമിത് ഷാ പറഞ്ഞത് തങ്ങള്‍ ഇതിനകം അയോധ്യയില്‍ രാമക്ഷേത്രം നിർമ്മിച്ചുവെന്നും, ഇപ്പോള്‍ ബീഹാറില്‍ ഒരു വലിയ സീതാക്ഷേത്രം നിർമ്മിക്കാനുള്ള സമയമാണിതെന്നും ആണ്. സീതാദേവി തൻ്റെ ജീവിതത്തിലൂടെ അനുഷ്ഠിച്ച ആദർശങ്ങളുടെ സന്ദേശം നല്‍കുന്നതാണ് ഈ മഹാക്ഷേത്രമെന്നും, തീർച്ചയായും ബീഹാറില്‍ മാ ജാങ്കി ക്ഷേത്രം നിർമ്മിക്കുമെന്നും പറഞ്ഞ അദ്ദേഹം, നിയമസഭാ തെരഞ്ഞെടുപ്പിന് മുന്നോടിയായി തങ്ങള്‍ ക്യാമ്ബ് ചെയ്യുന്ന ബിഹാറില്‍ തന്നോടൊപ്പം ചേരാൻ മിഥിലയിലെ ജനങ്ങളെ ക്ഷണിക്കുന്നുവെന്നും കൂട്ടിച്ചേർത്തു.
തൊട്ടുപിന്നാലെ പ്രതികരണവുമായി ആർ ജെ ഡി തലവൻ ലാലു പ്രസാദ് രംഗത്തെത്തി. അമിത് ഷായ്ക്ക് ക്യാമ്ബുകള്‍ നടത്താൻ ബീഹാറിന് സ്ഥലമില്ല എന്നാണ് അദ്ദേഹം പറഞ്ഞത്. സീതാക്ഷേത്രം നിർമ്മിച്ചതിൻ്റെ ക്രെഡിറ്റുമായി ബിജെപി ഓടിപ്പോകരുതെന്ന് ഒരു മുതിർന്ന ആർ ജെ ഡി നേതാവ് പറഞ്ഞു
