വയനാട് : കണ്ണൂരില്‍ തണ്ടര്‍ബോള്‍ട്ടുമായുള്ള ഏറ്റുമുട്ടലില്‍ ഒരാള്‍ കൊലപ്പെട്ടുവെന്നും രക്തത്തിന് രക്തം കൊണ്ട് പകരം ചോദിക്കുമെന്നും മാവോയിസ്റ്റ് പോസ്റ്റര്‍.
നവംബര്‍ 13 ന് രാവിലെ 9.50 നായിരുന്നു ഏറ്റുമുട്ടല്‍ ഉണ്ടായത്. കവിത (ലക്ഷ്മി) എന്ന മാവോയിസ്റ്റാണ് കൊലപ്പെട്ടതെന്ന് തിരുനെല്ലിയില്‍ പതിച്ച പോസ്റ്ററില്‍ പറയുന്നു.
കവിതയുടെ ഭൗതിക ശരീരം ഒരു വിപ്ലവകാരിക്ക് ലഭിക്കേണ്ട എല്ലാ ബഹുമതികളോടും കൂടി പശ്ചിമഘട്ടത്തില്‍ സംസ്കരിച്ചുവെന്നും മാവോയിസ്റ്റുകളുടേത് എന്ന് സംശയിക്കപ്പെടുന്ന കത്തില്‍ പറഞ്ഞിരുന്നു. കബനി ദളത്തിന്റെ മുൻ കമാൻഡര്‍ ആയിരുന്ന ലക്ഷ്മി എന്ന കവിത കൊല്ലപ്പെടുമ്ബോള്‍ കബനി ഏരിയ സെക്രട്ടറി ആയിരുന്നെന്നും കത്തില്‍ പറയുന്നു.
കവിതയുടെ കൊലപാതകത്തില്‍ പ്രതികാരം ചെയ്യാൻ ഒരുങ്ങണമെന്നും കത്തില്‍ ആഹ്വാനം ചെയ്യുന്നുണ്ട്. കൊല്ലപ്പെട്ടുവെന്ന് കരുതുന്ന കവിത (ലക്ഷ്മി) 2021 ല്‍ കീഴടങ്ങിയ ലിജേഷ് എലിയാസ് രാമു എന്ന മാവോയിസ്റ്റിന്റെ ഭാര്യയാണ്. ആന്ധ്രാപ്രദേശിലെ റായലസീമ സ്വദേശിനിയാണ് കവിതയെന്നും കത്തില്‍ സൂചനയുണ്ട്. കര്‍ണാടകത്തിലെ തുംഗഭദ്ര ദളത്തിന്റെ ഭാഗമായിരുന്നു ആദ്യം കവിത. 2015 ല്‍ പശ്ചിമഘട്ട പ്രത്യേക മേഖലാ കമ്മിറ്റിയുടെ ഭാഗമായതാണ്.