ചെറുതോണി: ഹൈറേഞ്ചിലെ കുറിയ തെങ്ങുകളുടെ അമരക്കാരനാണ് തോപ്രാംകുടിക്കാരന്‍ മുരിങ്ങയില്‍ ജോസഫ്. അരനൂറ്റാണ്ടു മുമ്ബ് തോപ്രാംകുടിയിലെത്തിയ കാലം മുതല്‍ കൃഷിയാണ് കൈമുതല്‍. വിവിധ കൃഷികള്‍ പരീക്ഷിച്ച്‌ വിജയം കൊയ്ത ഈ അധ്വാനശീലന്‍ ഇപ്പോള്‍ അറിയപ്പെടുന്നത് മലേഷ്യന്‍ കുള്ളന്‍ തെങ്ങുകളുടെ പ്രചാരകനായാണ്.
ഹൈറേഞ്ചിലെ വളക്കൂറുള്ള മണ്ണില്‍ പൊന്ന് വിളയിക്കാമെന്ന് തെളിയിച്ചതോടെ ജോസഫിനെത്തേടി കുള്ളന്‍ തെങ്ങിന്‍ തൈകള്‍ക്കായി കര്‍ഷകരെത്താന്‍ തുടങ്ങി. ഇപ്പോള്‍ മൂലമറ്റത്തെ സ്വന്തം നഴ്സറിയില്‍ ഉല്‍പാദിപ്പിക്കുന്ന തെങ്ങിന്‍ തൈകള്‍ ജില്ലയും കടന്നു പുറത്തേക്കു പോകാന്‍ തുടങ്ങി. ഇതിനിടെ നാളികേര വികസന ബോര്‍ഡിെന്‍റ അംഗീകാരവും കിട്ടി.
തമിഴ്നാട്ടിലെ പൊള്ളാച്ചിയിലെ മികച്ച ഫാമില്‍നിന്ന് കൊണ്ടുവരുന്ന വിത്തു തേങ്ങയാണ് തൈ ഉല്‍പാദനത്തിനായി ഉപയോഗിക്കുന്നത്. വര്‍ഷവും കേടില്ലാത്ത തേങ്ങകള്‍ ശരാശരി 200 എണ്ണം വീതം ലഭിക്കും. മൂന്നാം വര്‍ഷം കായ്ക്കുന്ന മലയന്‍ പച്ച മഞ്ഞ, ഓറഞ്ച് ഗംഗാബോണ്ടം ഇനം തെങ്ങിന്‍ തൈകള്‍ക്കാണ് കൂടുതല്‍ ആവശ്യക്കാര്‍. ജോസഫിെന്‍റ പടമുഖത്തെ രണ്ടര ഏക്കര്‍ സ്ഥലത്ത് മംഗലാപുരം മംഗളാ കമുകിന്‍ തൈകളും ചിക്കമംഗളൂരിലെ ചന്ദ്രഗിരി കാപ്പിത്തൈകളും കരിമുണ്ട, പന്നിയൂര്‍ മുണ്ട, നീലമുണ്ടി, കൊറ്റനാടന്‍ കുരുമുളകു ചെടികളും സമൃദ്ധമായി വളരുന്നു. ഭാര്യ ഗ്രേസിയും രണ്ടു മക്കളും പിന്തുണയുമായി ഒപ്പമുണ്ട്