തൃശൂര്‍: തദ്ദേശ വകുപ്പ് നടത്തിയ അതിദാരിദ്ര സര്‍വേ കണക്കെടുപ്പ് പൂര്‍ത്തിയായപ്പോള്‍ സംസ്ഥാനത്ത് 73,555 അതിദരിദ്ര കുടുംബങ്ങളെന്ന് കണ്ടെത്തല്‍.
സംസ്ഥാനത്തെ മൊത്തം കുടുംബങ്ങളുടെ 0.73 ശതമാനം വരും ഇത്. കൂടുതല്‍ അതിദരിദ്രര്‍ മലപ്പുറത്താണ്. കുറവ് കോട്ടയത്തും.
അഞ്ചുവര്‍ഷം കൊണ്ട് സംസ്ഥാനത്ത് ദാരിദ്ര്യം പൂര്‍ണമായും ഒഴിവാക്കാനുള്ള പദ്ധതികള്‍ ആസൂത്രണം ചെയ്യാന്‍ ലക്ഷ്യമിട്ടാണ് അതിദരിദ്ര സര്‍വേ നടത്തിയത്. ദാരിദ്ര്യ ലിസ്റ്റിന് ഗ്രാമസഭതലത്തില്‍ അംഗീകാരം നല്‍കുന്ന നടപടി ഇനിയും പൂര്‍ത്തിയായിട്ടില്ല. ഇതുവരെ 68 ശതമാനം (13266) ഗ്രാമസഭകള്‍ പൂര്‍ത്തിയായി ലിസ്റ്റിന് അംഗീകാരം നല്‍കിയതായി തദ്ദേശവകുപ്പ് അധികൃതര്‍ അറിയിച്ചു.
രാജ്യത്താദ്യമായി ജനപങ്കാളിത്തത്തോടെ നടത്തുന്ന സര്‍വേയാണിത്. സംസ്ഥാനത്തെ 1034 തദ്ദേശ സ്വയംഭരണ സ്ഥാപനങ്ങളില്‍ കണക്കെടുപ്പ് പൂര്‍ത്തിയായപ്പോള്‍ പട്ടികയില്‍ 14316-പട്ടികജാതി, 3432 -പട്ടികവര്‍ഗ കുടുംബങ്ങളും മറ്റ് വിഭാഗങ്ങളില്‍പെട്ട 55807 കുടുംബങ്ങളും ഉള്‍പ്പെടുന്നു. തീരവാസികള്‍ -3042, ഏകാംഗ കുടുംബങ്ങള്‍ -49826, രണ്ടംഗ കുടുംബങ്ങള്‍ -11365.
ജനുവരി 31ന് തിരുവനന്തപുരം ജില്ല ഒഴികെ മറ്റെല്ലാ ജില്ലകളിലെയും കണക്കെടുപ്പ് പൂര്‍ത്തിയായിരുന്നു. കോവിഡിന്‍റെ പശ്ചാത്തലത്തില്‍ പട്ടികയുടെ അവസാന നടപടിക്രമത്തില്‍ ഓണ്‍ലൈനായാണ് ഗ്രാമസഭകള്‍ ചേരുന്നത്. അടുത്തദിവസംതന്നെ ഇവ പൂര്‍ത്തിയാകും.
2015-16 അടിസ്ഥാന വര്‍ഷമാക്കി നിതീ ആയോഗ് പ്രസിദ്ധീകരിച്ച ദാരിദ്ര്യ സൂചികയില്‍ കേരളത്തിലായിരുന്നു ദരിദ്രര്‍ കുറവ് -0.71 ശതമാനം. ആ വിലയിരുത്തലില്‍നിന്ന് അല്‍പം കൂടുതലാണ് യഥാര്‍ഥ അതിദരിദ്രരെന്നാണ് ഇപ്പോഴത്തെ സര്‍വേ കണ്ടെത്തല്‍. നിര്‍ധനരും നിരാലംബരുമായ കുടുംബങ്ങളുടെ സംരക്ഷണം ലക്ഷ്യമിട്ട ‘ആശ്രയ പദ്ധതി’യില്‍ സംസ്ഥാനത്ത് ഗുണഭോക്താക്കളായി 1,54,712 പേരുണ്ട്. ദാരിദ്ര്യരേഖക്ക് താഴെയുള്ള കുടുംബങ്ങളായി അന്നപൂര്‍ണ അന്ത്യാദയ യോജന (എ.എ.വൈ) റേഷന്‍ കാര്‍ഡുള്ള 5,91,548 പേരുണ്ട്. ഇതിനുപുറമേയാണ് അതിദാരിദ്രമുള്ളവരുടെ ലിസ്റ്റ് കൂടി ചേരുന്നത്.
അതിദരിദ്രരെ കണ്ടെത്താന്‍ പരിഗണിച്ച പ്രധാന ഘടകങ്ങള്‍
1. ഒരുവരുമാനവും ഇല്ലാത്തവര്‍ 2. വീടില്ലാത്തവര്‍ 3. രണ്ടുനേരം പോലും ഭക്ഷണം കിട്ടാത്തവര്‍ 4. സൗജന്യറേഷനടക്കമുള്ളവ കിട്ടിയാലും പാകം ചെയ്ത് കഴിക്കാന്‍ സൗകര്യമില്ലാത്തവര്‍ 5. ആരോഗ്യമില്ലാത്തവരും കിടപ്പുരോഗികളും 6. രോഗം കൊണ്ട് കടം കയറിയവര്‍.
പങ്കാളികളായത് 13,74,072 പേര്‍
തൃശൂര്‍: അതിദാരിദ്ര്യ സര്‍വേക്കുവേണ്ടി നടന്നത് ലോകത്തിനുതന്നെ മാതൃകയായ പൊതുജനപങ്കാളിത്തം. സംസ്ഥാനത്തെ 1034 തദ്ദേശ സ്ഥാപനങ്ങളിലെ 19,489 വാര്‍ഡുകളിലായി നടന്നത് അതിദരിദ്രരെ നിര്‍ദേശിക്കാനുള്ള പൊതുജന പങ്കാളിത്തമുള്ള 69,119 ഫോക്കസ്ഗ്രൂപ് ചര്‍ച്ചകളാണ്. പിന്നീട് കണക്കെടുപ്പിന് മുമ്ബുള്ള പ്രാഥമിക കണക്കെടുപ്പും (പ്രീ എന്യുമറേഷന്‍), ശേഷമുള്ള കൃത്യത ഉറപ്പാക്കാനുള്ള സൂപ്പര്‍ ചെക്കും പൂര്‍ത്തിയാക്കി.
അതിദാരിദ്ര്യ നിര്‍ണയ പ്രക്രിയയില്‍ ഉദ്യോഗസ്ഥര്‍, എന്യൂമറേറ്റര്‍മാര്‍, സന്നദ്ധ പ്രവര്‍ത്തകര്‍, ജനപ്രതിനിധികള്‍, കുടുംബശ്രീ, ആശവര്‍ക്കര്‍മാര്‍, അംഗന്‍വാടി, തൊഴിലുറപ്പ്, റെസിഡന്‍റ്സ് അസോസിയേഷന്‍ പ്രവര്‍ത്തകര്‍ എന്നിവരുള്‍പ്പെടെ 13,74,072 പേര്‍ ഭാഗമായി. കണക്കെടുപ്പിലാകട്ടെ 35,888 ഉദ്യോഗസ്ഥരും സന്നദ്ധപ്രവര്‍ത്തകരും സഹകരിച്ചു. ആദ്യഘട്ടത്തില്‍ 69,119 ഫോക്കസ് ഗ്രൂപ് ചര്‍ച്ചകളിലൂടെ 1,18,309 ഗുണഭോക്തൃ സാധ്യത ലിസ്റ്റ് തയാറാക്കിയിരുന്നു. ഉപസമിതി അംഗീകാരവും പ്രാഥമിക കണക്കപ്പെടുപ്പും പൂര്‍ത്തിയായപ്പോള്‍ ഇത് 87,158 പേരായി. പിന്നീട് 20 ശതമാനത്തെ സൂപ്പര്‍ ചെക്ക് (17,265) ചെയ്തശേഷമാണ് അന്തിമപട്ടിക തയാറാക്കിയത്.
അതിദരിദ്രരുടെ പട്ടിക: ജില്ല തിരിച്ച്‌
ജില്ല കുടുംബങ്ങളുടെ എണ്ണം ശതമാനം
മലപ്പുറം 12,802 1.186
തിരുവനന്തപുരം 8185 0.734
കോഴിക്കോട് 7951 0.921
പാലക്കാട് 6645 0.772
എറണാകുളം 5888 0.579
തൃശൂര്‍ 5399 0.558
കണ്ണൂര്‍ 5148 0.74
കൊല്ലം 4857 0.568
ആലപ്പുഴ 3787 0.61
വയനാട് 3338 1.412
കാസര്‍കോട് 2930 0.825
പത്തനംതിട്ട 2817 0.705
ഇടുക്കി 2689 0.78
കോട്ടയം 1119 0.193
ആകെ 73,555 0.736