തിരുവനന്തപുരം: ഐ.എസ്.ആര്.ഒയുടെയും വി.എസ്.എസ്.സിയുടെയും തലപ്പത്ത് മലയാളികള് എത്തിയതോടെ ഇനി ഇന്ത്യന് ബഹിരാകാശ രംഗം ‘കേരളം ഭരിക്കും’.
ആലപ്പുഴ തുറവൂര് സ്വദേശി എസ്. സോമനാഥിന് ഭാരതീയ ബഹിരാകാശ ഗവേഷണ കേന്ദ്ര ചുമതല നല്കി ദിവസങ്ങള് കഴിയുമ്ബോഴാണ് വിക്രം സാരാഭായ് സ്േപസ് സെന്ററിന്റെ ചുക്കാന് കോട്ടയം കോതനല്ലൂര് സ്വദേശി എസ്. ഉണ്ണികൃഷ്ണന് നായരെ ഏല്പ്പിച്ചത്. ഡോ. ജി.മാധവന് നായര് ഐ.എസ്.ആര്.ഒ ചെയര്മാനായിരിക്കെ ഡോ. കെ. രാധാകൃഷ്ണന് വി.എസ്.എസ്.സി ഡയറക്ടറായതിന് ശേഷം ആദ്യമാണ് തലപ്പത്തെ മലയാളിത്തിളക്കം.
ഒരേ കളരിയില് ബഹിരാകാശ ശാസ്ത്ര പാഠങ്ങള് പഠിച്ച സമകാലികരും സുഹൃത്തുകളുമാണ് ഡോ. സോമനാഥും ഉണ്ണികൃഷ്ണന് നായരും. ഇരുവരും ബംഗളൂരു ഇന്ത്യന് ഇന്സ്റ്റിറ്റ്യൂട്ട് ഓഫ് സ്പേസ് സയന്സില് നിന്ന് എയ്റോ സ്പേസ് എന്ജിനീയറിങ്ങിലാണ് എം.ടെക് നേടിയത്. 1985ല് ആദ്യ പി.എസ്.എല്.വി റോക്കറ്റ് നിര്മാണത്തിനായി ഇരുവരും വലിയമല ഐ.എസ്.ആര്.ഒ യിലെത്തി. അന്ന് സോമനാഥിനൊപ്പം കൊല്ലം ടി.കെ.എം. എന്ജിനീയറിങ് കോളജിലെ അവസാനവര്ഷ വിദ്യാര്ഥി വി.പി. ജോയിയും ഉണ്ടായിരുന്നു. വി.പി. ജോയി ഐ.എ.എസ് നേടി കേരളത്തിന്റെ ഉദ്യോഗസ്ഥ തലപ്പത്ത് ഉണ്ടെന്നതും മറ്റൊരു കൗതുകം.ബഹിരാകാശത്ത് മനുഷ്യനെ എത്തിക്കാനുള്ള ഗഗന്യാന് അടക്കം ഒരുപിടി സുപ്രധാന പദ്ധതികളാണ് ഇരുവര്ക്കും മുന്നിലുള്ളത്. ഗഗന്യാനിന്റെ ബുദ്ധികേന്ദ്രങ്ങളില് പ്രധാനിയാണ് ഉണ്ണികൃഷ്ണന് നായര്. ഗഗന്യാനിന്റെ ആളില്ലാ പരീക്ഷണം ഈ വര്ഷം ആദ്യ പകുതിയില് നടക്കും. വിജയിച്ചാല് അടുത്ത വര്ഷം ബഹിരാകാശ യാത്ര. ആലപ്പുഴ സ്വദേശി ആര്. ഹട്ടനും ഗഗന്യാന് േപ്രാജക്ട് ഡയറക്ടറായി ഒപ്പമുണ്ട്.
ചന്ദ്രയാന് മൂന്നിന്റെ പ്രവര്ത്തനങ്ങള് എസ്. സോമനാഥിന്റെ നേതൃത്വത്തില് നടന്നുവരുകയാണ്. ചന്ദ്രന്റെ ദക്ഷിണ ധ്രുവത്തില് ലാന്ഡറും റോവറും ഇറക്കാനാണ് പദ്ധതി. സൂര്യന്റെ അന്തരീക്ഷത്തെക്കുറിച്ചും പുറംപാളിയെക്കുറിച്ചും പഠിക്കാനുള്ള ആദിത്യ എല് 1, ശുക്രനെപ്പറ്റി പഠിക്കാനുള്ള ശുക്രയാന്, പുത്തന് ഗ്രഹങ്ങളെ കണ്ടെത്താനും പ്രപഞ്ച ഉല്പത്തിയെക്കുറിച്ച വിവരങ്ങള് ശേഖരിക്കാനുമുള്ള ആസ്ട്രോസാറ്റ്-2, പുനരുപയോഗ്യ റോക്കറ്റ്, എസ്.എസ്.എല്.വി എന്ന ചെറു വിക്ഷേപണ വാഹനം, കോസ്മിക് കിരണങ്ങള് പഠിക്കാനുള്ള എക്സ്പോ സാറ്റ് എന്നിവയൊക്കെ രാജ്യം ഇനി സ്വപ്നം കാണുന്നത് ഈ രണ്ട് മലയാളികളിലൂടെയാകും.
ഉണ്ണികൃഷ്ണന് നായര് കോതമംഗലം മാര് അതനേഷ്യസില്നിന്നാണ് മെക്കാനിക്കല് എന്ജിനീയറിങ്ങില് ബി.ടെക് നേടിയത്. 1985ല് വി.എസ്.എസ്.സിയില് ചേര്ന്നു. അഡ്വാന്സ് സ്പേസ് ട്രാന്സ്പോര്ട്ടേഷന് സിസ്റ്റം (എ.എസ്.ടി.എസ്) പ്രോഗ്രാം ഡയറക്ടര്, വി.എസ്.എസ്.സി ഡെപ്യൂട്ടി ഡയറക്ടര് (സ്ട്രക്ച്ചേഴ്സ്), ഹ്യൂമന് സ്പേസ് ഫ്ലൈറ്റ് പദ്ധതിയുടെ ആദ്യ പ്രോജക്ട് ഡയറക്ടര് തുടങ്ങിയ പദവികള് വഹിച്ചു.
അന്താരാഷ്ട്ര അസ്ട്രോണമിക്കല് അസോസിയേഷന്റെ പഠന ഗ്രൂപ്പുകളുടെ തലവനായിരുന്നു. മൂന്നു പുസ്തകം രചിച്ചിട്ടുണ്ട്. ഇന്സ്റ്റിറ്റ്യൂഷന് ഓഫ് എന്ജിനീയേഴ്സ് ഇന്ത്യ (ഐ.ഇ.ഐ), സൊസൈറ്റി ഫോര് ഫെയില്യുര് അനാലിസിസ്, അക്കൗസ്റ്റിക്കല് സൊസൈറ്റി ഓഫ് ഇന്ത്യ, നാഷനല് സൊസൈറ്റി ഫോര് എയ്റോസ്പേസ് ആന്ഡ് റിലേറ്റഡ് മെക്കാനിസം തുടങ്ങിയ പ്രഫഷനല് അക്കാദമിക് ബോഡികളില് ഫെലോ ആണ്.
വി.എസ്.എസ്.സി മുന് കമ്ബ്യൂട്ടര് എന്ജിനീയര് ജയ ജി. നായരാണ് ഭാര്യ. മക്കള്: ഐശ്വര്യ നായര് (എന്ജിനീയര്, മുംബൈ), ചൈതന്യ നായര് (ബിരുദ വിദ്യാര്ഥി, പുണെ)