തിരുവനന്തപുരം: നയപ്രഖ്യാപന പ്രസംഗം നടത്താന്‍ ഭരണഘടനാപരമായ ബാധ്യതയുള്ള ഗവര്‍ണര്‍ അവസാന ഖണ്‌ഡിക മാത്രം വായിച്ച്‌ മടങ്ങിയത്‌ നിയമസഭയോടുള്ള അവഹേളനമാണെന്നു പ്രതിപക്ഷ നേതാവ്‌ വി.ഡി.
സതിശന്‍. ഇതില്‍ പ്രതിപക്ഷത്തിനു ശക്‌തമായ പ്രതിഷേധം ഉണ്ട്‌. സര്‍ക്കാരും ഗവര്‍ണറും നടത്തുന്ന രാഷ്‌ട്രീയ നാടകത്തിന്റെ പരിതാപകരമായ അന്ത്യമായാണ്‌ നിയമസഭയിലുണ്ടായത്‌. സര്‍ക്കാരിന്റെ സ്‌ഥിതി പ്രതിഫലിക്കുന്ന നയപ്രഖ്യാപന പ്രസംഗമാണ്‌ ഗവര്‍ണര്‍ക്ക്‌ നല്‍കിയത്‌. നയപ്രഖ്യാപനത്തില്‍ കേന്ദ്രത്തിനെതിരേ ഒരു വിമര്‍ശനവുമില്ല. കേന്ദ്രത്തിന്‌ എതിരായി ഡല്‍ഹിയില്‍ സമരം ചെയ്യാന്‍ പോകുമെന്ന്‌ പ്രഖ്യാപിച്ച മുഖ്യമന്ത്രി കേന്ദ്ര ഏജന്‍സികളെ ഭയന്ന്‌ സമരം സമ്മേളനമാക്കി മാറ്റിയ ദയനീയ കാഴ്‌ചയാണ്‌ കാണുന്നതെന്നു അദ്ദേഹം പറഞ്ഞു
ഒന്നിച്ചുള്ള സമരത്തിന്‌ തയാറല്ലെന്ന്‌ പ്രതിപക്ഷം അറിയിച്ചപ്പോള്‍ ഒറ്റയ്‌ക്ക്‌ സമരം ചെയ്യുമെന്ന്‌ എല്‍.ഡി.എഫ്‌ പ്രഖ്യാപിച്ച്‌ മണിക്കൂറുകള്‍ക്കുള്ളിലാണ്‌ സമരം പൊതുസമ്മേളനമാക്കി മാറ്റിയത്‌. മുഖ്യമന്ത്രി ജീവിക്കുന്നതു തന്നെ കേന്ദ്ര സര്‍ക്കാരിനെയും കേന്ദ്ര ഏജന്‍സികളെയും ഭയന്നാണെന്നും സതിശന്‍ പറഞ്ഞു.
വിലക്കയറ്റം പിടിച്ചു നിര്‍ത്തേണ്ട അഭിമാന സ്‌ഥാപനമായ സപ്‌ളൈകോ തകര്‍ന്നു പോയി. സാമൂഹിക സുരക്ഷാ പെന്‍ഷനുകള്‍ വിതരണം ചെയ്‌തിട്ട്‌ ആറ്‌ മാസമായി. പെന്‍ഷന്‍ ലഭിക്കാതെ ആത്മഹത്യ ചെയ്‌ത സംഭവം വരെ കേരളത്തിലുണ്ടായി. പെന്‍ഷന്‍ മുടങ്ങിയതിനെ തുടര്‍ന്ന്‌ മരുന്നും ഭക്ഷണവും ഇല്ലാതെ ലക്ഷക്കണക്കിന്‌ പേരാണു കഷ്‌ടപ്പെടുന്നത്‌. ഇത്രയും മോശമായ നയപ്രഖ്യാപനം കേരളത്തിന്റെ ചരിത്രത്തില്‍ ഉണ്ടായിട്ടില്ലെന്നും സതിശന്‍ കുറ്റപ്പെടുത്തി.